Kifo cha Musa

¹Kisha Musa akaupanda mlima Nebo kutoka tambarare za Moabu hadi kilele cha Pisga, ngʼambo ya Yeriko. Huko Bwana akamwonesha nchi yote: kutoka Gileadi hadi Dani,

²Naftali yote, nchi ya Efraimu na Manase, nchi yote ya Yuda hadi bahari ya magharibi,[#34:2 yaani Bahari ya Mediterania]

³Negebu na nchi yote kuanzia Bonde la Yeriko, Mji wa Mitende, hadi Soari.

⁴Kisha Bwana akamwambia, “Hii ndiyo nchi niliyomwahidi Abrahamu na Isaka na Yakobo kwa kiapo niliposema, ‘Nitawapa wazao wako.’ Nimekuruhusu uione kwa macho yako, lakini hutavuka kuingia.”

⁵Naye Musa mtumishi wa Bwana akafa huko Moabu, kama Bwana alivyokuwa amesema.

⁶Mungu akamzika huko Moabu, katika bonde mkabala na Beth-Peori, lakini hakuna ajuaye kaburi lake lilipo hadi leo.

⁷Musa alikuwa na umri wa miaka mia moja na ishirini alipofariki; hata hivyo nguvu ya macho yake haikufifia wala mwili wake haukudhoofika.

⁸Waisraeli wakaomboleza kwa ajili ya Musa kwenye tambarare za Moabu kwa siku thelathini, hadi wakati wa kulia na kuomboleza ulipopita.

⁹Basi Yoshua mwana wa Nuni alijazwa roho ya hekima kwa sababu Musa alikuwa ameweka mikono yake juu yake. Kwa hiyo Waisraeli wakamsikiliza na wakafanya yale ambayo Bwana alikuwa amemwagiza Musa.

¹⁰Tangu wakati huo, katika Israeli hajainuka nabii mwingine kama Musa, ambaye Bwana alimjua uso kwa uso,

¹¹aliyetenda ishara zote zile za miujiza na maajabu ambayo Bwana alimtuma kuyatenda huko Misri, yaani kwa Farao na maafisa wake wote na nchi yake yote.

¹²Kwa kuwa hakuna mtu yeyote aliyewahi kuonesha nguvu nyingi ama kutenda matendo ya kutisha ambayo Musa aliwahi kuyafanya mbele ya Israeli yote.