Uhuru ndani ya Kristo

¹Kristo alitupatia uhuru, akataka tubaki huru. Hivyo simameni imara wala msikubali tena kulemewa na nira ya utumwa.

²Sikilizeni! Mimi, Paulo, nawaambieni kwamba mkikubali kutahiriwa, basi Kristo hatakuwa na thamani kwenu hata kidogo.

³Namshuhudia tena kila mtu anayekubali kutahiriwa kwamba inampasa kushika sheria yote.

⁴Ninyi mnaotafuta kuhesabiwa haki kupitia kwa sheria mmetengwa na Kristo, mko mbali na neema ya Mungu.

⁵Kwa maana, kupitia Roho tunangojea kwa shauku tumaini la haki kwa imani.

⁶Kwa maana ndani ya Kristo Yesu, kutahiriwa au kutokutahiriwa hakuleti tofauti, bali lililo muhimu ni imani itendayo kazi kupitia kwa upendo.

⁷Mlikuwa mkipiga mbio vizuri. Ni nani aliyewazuia msiitii kweli?

⁸Ushawishi kama huo haukutoka kwa yule anayewaita.

⁹“Chachu kidogo huchachua donge zima.”

¹⁰Nina hakika katika Bwana kwamba hamtakuwa na msimamo mwingine. Mtu anayewachanganya anastahili adhabu, hata awe nani.

¹¹Lakini ndugu zangu, kama mimi bado ninahubiri kuhusu kutahiriwa, kwa nini bado ninateswa? Katika hiyo hali basi, kwazo la msalaba limeondolewa.

¹²Laiti hao wanaowavuruga wangejihasi wao wenyewe!

¹³Ndugu zangu, ninyi mliitwa ili mwe huru, hivyo msitumie uhuru wenu kama fursa ya kufuata tamaa za mwili, bali tumikianeni ninyi kwa ninyi kwa upendo.

¹⁴Kwa maana sheria yote hukamilika katika amri moja: “Mpende jirani yako kama nafsi yako.”[#5:14 Law 19:18]

¹⁵Lakini mkiumana na kutafunana, angalieni msije mkaangamizana.

Maisha ya Kiroho

¹⁶Kwa hiyo nasema, nendeni kwa Roho, wala hamtazitimiza kamwe tamaa za mwili.

¹⁷Kwa maana mwili hutamani yale yaliyo kinyume na Roho, naye Roho hutamani yale yaliyo kinyume na mwili. Roho na mwili hupingana na kwa sababu hiyo hamwezi kufanya mnayotaka.

¹⁸Lakini mkiongozwa na Roho, hamko chini ya sheria.

¹⁹Basi matendo ya mwili ni dhahiri, nayo ni haya: Uasherati, uchafu, ufisadi,

²⁰kuabudu sanamu, uchawi, uadui, ugomvi, wivu, hasira, fitina, faraka, uzushi,

²¹husuda, ulevi, ulafi na mambo mengine yanayofanana na hayo. Nawaonya, kama nilivyokwisha kuwaonya kabla, kwamba watu watendao mambo kama hayo, hawataurithi ufalme wa Mungu.

²²Lakini tunda la Roho ni upendo, furaha, amani, uvumilivu, utu wema, fadhili, uaminifu,

²³upole na kiasi. Katika mambo kama haya hakuna sheria.

²⁴Wote walio wa Kristo Yesu wameusulubisha mwili na shauku zake pamoja na tamaa zake.

²⁵Kwa kuwa tunaishi kwa Roho, basi, tuenende kwa Roho.

²⁶Tusijisifu bure, tukichokozana na kuoneana wivu.