Yakobo arudi Betheli

¹Kisha Mungu akamwambia Yakobo, “Panda uende Betheli ukakae huko. Ukamjengee Mungu madhabahu huko, Yeye aliyekutokea ulipokuwa unamkimbia Esau ndugu yako.”

²Hivyo Yakobo akawaambia watu wa nyumbani mwake pamoja na wote waliokuwa naye, “Iondoeni miungu ya kigeni mliyo nayo, mjitakase na mkabadilishe nguo zenu.

³Kisha njooni, twende Betheli, mahali nitakapomjengea Mungu madhabahu, aliyenijibu katika siku ya shida yangu, ambaye amekuwa pamoja nami popote nilipoenda.”

⁴Kwa hiyo wakampa Yakobo miungu yote ya kigeni waliyokuwa nayo, pamoja na pete zilizokuwa masikioni mwao. Yakobo akavizika chini ya mwaloni ulio Shekemu.

⁵Kisha wakaondoka, na utisho wa Mungu ukaipata miji yote iliyowazunguka. Kwa hiyo hakuna aliyewafuatia wana wa Yakobo.

⁶Yakobo na watu wote waliokuwa pamoja naye wakafika Luzu (ndio Betheli), katika nchi ya Kanaani.

⁷Huko akajenga madhabahu na akapaita mahali pale El-Betheli, kwa sababu mahali pale ndipo Mungu alijifunua kwake alipokuwa akimkimbia ndugu yake.[#35:7 maana yake Mungu wa Betheli]

⁸Wakati huu Debora, mlezi wa Rebeka, akafa na akazikwa chini ya mwaloni ulio nje ya Betheli. Kwa hiyo pakaitwa Alon-Bakuthi.[#35:8 maana yake Mwaloni wa kilio]

⁹Baada ya Yakobo kurudi kutoka Padan-Aramu, Mungu alimtokea tena na kumbariki.

¹⁰Mungu akamwambia, “Jina lako ni Yakobo. Lakini hutaitwa tena Yakobo; jina lako litakuwa Israeli.” Kwa hiyo akamwita Israeli.[#35:10 maana yake Ashikaye kisigino , au Atwaaye mahali pa mwingine , au Mdanganyaji; #35:10 maana yake Yeye ashindanaye na Mungu]

¹¹Mungu akamwambia, “Mimi ndimi Mungu Mwenyezi; ukazae na kuongezeka. Taifa na jamii ya mataifa itatoka kwako, nao wafalme watatoka viunoni mwako.[#35:11 Kiebrania El-Shaddai (yaani Mungu Mwenye utoshelevu wote).]

¹²Nchi niliyowapa Abrahamu na Isaka nakupa wewe pia, nami nitawapa wazao wako baada yako.”

¹³Kisha Mungu akapanda juu kutoka kwake mahali pale alipozungumza naye.

¹⁴Yakobo akasimamisha nguzo ya jiwe mahali pale Mungu alipozungumza naye, akamimina sadaka ya kinywaji juu yake, pia akamimina mafuta juu yake.

¹⁵Yakobo akapaita mahali pale Mungu alipozungumza naye Betheli.[#35:15 maana yake Nyumba ya Mungu]

Vifo vya Raheli na Isaka

¹⁶Kisha wakaondoka Betheli. Kabla hawajafika Efrata, Raheli akaanza kujifungua na akapata shida kuu.

¹⁷Alipokuwa katika shida hii katika kujifungua, mkunga akamwambia, “Usiogope, kwa sababu umempata mwana mwingine.”

¹⁸Hapo alipopumua pumzi yake ya mwisho, kwa maana alikuwa akifa, akamwita mwanawe jina Benoni. Lakini babaye akamwita jina Benyamini.[#35:18 maana yake Mwana wa huzuni yangu; #35:18 maana yake Mwana wa mkono wangu wa kuume]

¹⁹Kwa hiyo Raheli akafa, na akazikwa kando ya njia iendayo Efrata (ndio Bethlehemu).

²⁰Yakobo akasimamisha nguzo juu ya kaburi lake, ambayo hadi leo inatambulisha kaburi la Raheli.

²¹Israeli akaendelea tena na safari yake na kupiga hema baada ya kupita Mnara wa Ederi.

²²Israeli alipokuwa akiishi katika nchi ile, Reubeni mwanawe alikutana kimwili na suria wa baba yake aliyeitwa Bilha, naye Israeli akasikia jambo hilo.

²³Wana wa Lea walikuwa:

²⁴Wana wa Raheli walikuwa:

²⁵Wana waliozaliwa na Bilha mjakazi wa Raheli walikuwa:

²⁶Wana waliozaliwa na Zilpa mjakazi wa Lea walikuwa:

²⁷Yakobo akarudi nyumbani mwa baba yake Isaka huko Mamre, karibu na Kiriath-Arba (yaani Hebroni), ambapo walikuwa wameishi Abrahamu na Isaka.

²⁸Isaka aliishi miaka mia moja na themanini.

²⁹Kisha Isaka akapumua pumzi yake ya mwisho, akafa; akakusanywa pamoja na watu wake akiwa mzee aliyeshiba siku. Nao Esau na Yakobo, wanawe, wakamzika.