Kaini na Abeli

¹Adamu akakutana kimwili na mkewe Hawa, naye akapata mimba, akamzaa Kaini. Hawa akasema, “Kwa msaada wa Bwana nimemzaa mtoto wa kiume.”

²Baadaye akamzaa Abeli ndugu yake.

Basi Abeli akawa mfugaji, na Kaini akawa mkulima.

³Baada ya muda, Kaini akaleta baadhi ya mazao ya shamba ikiwa sadaka kwa Bwana .

⁴Lakini Abeli akaleta fungu nono kutoka baadhi ya wazaliwa wa kwanza wa mifugo yake. Bwana akamkubali Abeli pamoja na sadaka yake,

⁵lakini Mungu hakumkubali Kaini pamoja na sadaka yake. Kwa hiyo Kaini akakasirika sana, uso wake ukawa na huzuni.

⁶Kisha Bwana akamwambia Kaini, “Kwa nini umekasirika? Kwa nini uso wako una huzuni?

⁷Ukifanya lililo sawa, je, hutakubalika? Lakini usipofanya lililo sawa, dhambi inakuvizia mlangoni mwako, ikikutamani wewe, lakini inakupasa uishinde.”

⁸Basi Kaini akamwambia ndugu yake Abeli, “Twende shambani.” Walipokuwa shambani, Kaini akamshambulia Abeli ndugu yake, akamuua.

⁹Kisha Bwana akamuuliza Kaini, “Ndugu yako Abeli yuko wapi?”

Akamjibu, “Sijui. Je, mimi ni mlinzi wa ndugu yangu?”

¹⁰Bwana akasema, “Umefanya nini? Sikiliza! Damu ya ndugu yako inanililia mimi kutoka ardhini.

¹¹Sasa umelaaniwa na umehamishwa kutoka ardhi, ambayo imefungua kinywa chake na kupokea damu ya ndugu yako kutoka mkononi mwako.

¹²Utakapoilima ardhi, haitakupa tena mazao yake. Utakuwa mtu wa kutangatanga duniani bila utulivu.”

¹³Kaini akamwambia Bwana , “Adhabu yangu ni zaidi ya ninavyoweza kustahimili.

¹⁴Leo unanifukuza kutoka nchi, nami nitafichwa mbali na uwepo wako. Nitakuwa mtu wa kutangatanga duniani bila utulivu, na yeyote anionaye ataniua.”

¹⁵Lakini Bwana akamwambia, “La, sivyo! Ikiwa mtu yeyote atamuua Kaini, atalipizwa kisasi mara saba.” Kisha Bwana akamwekea Kaini alama ili yeyote angemwona asimuue.

¹⁶Kwa hiyo Kaini akaondoka mbele za Bwana , akaenda kuishi katika nchi ya Nodi, mashariki mwa Edeni.

¹⁷Kaini akakutana kimwili na mkewe, naye akapata mimba na akamzaa Henoko. Wakati huo Kaini alikuwa anajenga mji, akauita Henoko, jina la mtoto wake.

¹⁸Henoko akamzaa Iradi; Iradi akamzaa Mehuyaeli; Mehuyaeli akamzaa Methushaeli; naye Methushaeli akamzaa Lameki.

¹⁹Lameki alioa wanawake wawili: mmoja aliitwa Ada, na mwingine Sila.

²⁰Ada akamzaa Yabali; huyu akawa baba wa wale wanaoishi katika mahema na kufuga wanyama.

²¹Kaka yake aliitwa Yubali, aliyekuwa baba wa wote wapigao zeze na filimbi.

²²Pia Sila alikuwa na mtoto wa kiume aliyeitwa Tubali-Kaini, ambaye alifua vifaa vya aina mbalimbali vya shaba na chuma. Naama alikuwa dada wa Tubali-Kaini.

²³Lameki akawaambia wake zake,

“Ada na Sila, nisikilizeni mimi;

wake wa Lameki sikieni maneno yangu.

Nimemuua mtu kwa kunijeruhi,

kijana mdogo kwa kuniumiza.

²⁴Kama Kaini atalipizwa kisasi mara saba,

basi Lameki itakuwa mara sabini na saba.”

²⁵Adamu akakutana kimwili na mke wake tena, akamzaa mwana, akamwita jina Sethi, akisema, “Mungu amenijalia mwana mwingine badala ya Abeli, kwa kuwa Kaini alimuua.”

²⁶Naye Sethi akamzaa mwana, akamwita jina Enoshi.

Wakati huo watu wakaanza kuliitia jina la Bwana .