Upendo wa Mungu kwa Israeli

¹“Israeli alipokuwa mtoto, nilimpenda;

nilimwita mwanangu kutoka Misri.

²Lakini kadiri nilivyomwita Israeli,

ndivyo walivyoenda mbali nami.

Walitoa dhabihu kwa Mabaali

na kufukiza uvumba kwa vinyago.

³Mimi ndiye niliyemfundisha Efraimu kutembea,

nikiwashika mikono;

lakini hawakutambua

kuwa ni mimi niliyewaponya.

⁴Niliwaongoza kwa kamba za huruma ya kibinadamu,

kwa vifungo vya upendo;

niliondoa nira shingoni mwao

nami nikainama kuwalisha.

⁵“Je, hawatarudi Misri,

nayo Ashuru haitawatawala

kwa sababu wamekataa kutubu?

⁶Upanga utavurumishwa katika miji yao,

nao utaharibu makomeo ya malango yao

na kukomesha mipango yao.

⁷Watu wangu wamedhamiria kuniacha.

Hata wakimwita Yeye Aliye Juu Sana,

kwa vyovyote hatawainua.

⁸“Efraimu, ninawezaje kukuacha?

Ee Israeli, ninawezaje kukutoa?

Nitawezaje kukutendea kama Adma?

Nitawezaje kukufanya kama Seboimu?

Moyo wangu umegeuka ndani yangu,

huruma zangu zote zimeamshwa.

⁹Sitatimiza hasira yangu kali,

wala sitageuka na kumharibu Efraimu.

Kwa kuwa mimi ndimi Mungu,

wala si mwanadamu,

Aliye Mtakatifu miongoni mwenu.

Sitakuja kwa ghadhabu.

¹⁰Watamfuata Bwana ;

atanguruma kama simba.

Anaponguruma,

watoto wake watakuja wakitetemeka

kutoka magharibi.

¹¹Watakuja wakitetemeka

kama ndege wakitoka Misri,

kama hua wakitoka Ashuru.

Nitawafanya waishi katika nyumba zao,”

asema Bwana .

Dhambi ya Israeli

¹²Efraimu amenizunguka kwa uongo,

nyumba ya Israeli kwa udanganyifu.

Naye Yuda ni mkaidi dhidi ya Mungu,

hata kinyume cha yule mwaminifu Aliye Mtakatifu.