¹Maono kuhusu Yuda na Yerusalemu ambayo Isaya mwana wa Amozi aliyaona wakati wa utawala wa Uzia, Yothamu, Ahazi na Hezekia, wafalme wa Yuda.

Taifa asi

²Sikieni, enyi mbingu! Sikilizeni, enyi dunia!

Kwa maana Bwana amesema:

“Nimewalisha watoto na kuwalea,

lakini wameniasi mimi.

³Ngʼombe anamjua bwana wake,

naye punda anajua hori la mmiliki wake,

lakini Israeli hajui,

watu wangu hawaelewi.”

⁴Ole wa taifa lenye dhambi,

watu waliolemewa na uovu,

uzao wa watenda mabaya,

watoto waliozoelea upotovu!

Wamemwacha Bwana ,

Wamemkataa kwa dharau

yeye Aliye Mtakatifu wa Israeli

na kumgeuzia kisogo.

⁵Kwa nini mzidi kupigwa?

Kwa nini kudumu katika uasi?

Kichwa chako chote kimejeruhiwa,

moyo wako wote ni mgonjwa.

⁶Kutoka wayo wako wa mguu hadi kwenye utosi wa kichwa chako

hakuna uzima:

ni majeraha matupu na makovu

na vidonda vinavyotoa damu,

havikusafishwa au kufungwa

wala kulainishwa kwa mafuta.

⁷Nchi yenu imekuwa ukiwa,

miji yenu imeteketezwa kwa moto;

mashamba yenu yameachwa tupu na wageni

mbele ya macho yenu,

yameharibiwa kama yaliyopinduliwa na wageni.

⁸Binti Sayuni ameachwa kama kipenu

katika shamba la mizabibu,

kama kibanda katika shamba la matango,

kama mji uliozingirwa.

⁹Kama Bwana wa majeshi

hakutuachia walionusurika,

tungekuwa kama Sodoma,

tungefanana na Gomora.

¹⁰Sikieni neno la Bwana ,

ninyi watawala wa Sodoma;

sikilizeni sheria ya Mungu wetu,

enyi watu wa Gomora!

¹¹Bwana anasema, “Wingi wa sadaka zenu,

ni kitu gani kwangu?

Nina sadaka za kuteketezwa nyingi kupita kiasi,

za kondoo dume na mafuta ya wanyama walionona.

Sipendezwi na damu za mafahali

wala za wana-kondoo na mbuzi.

¹²Mnapokuja kujihudhurisha mbele zangu,

ni nani aliyewataka ninyi mfanye hivyo,

huku kuzikanyaga nyua zangu?

¹³Acheni kuniletea sadaka zisizokuwa na maana!

Uvumba wenu ni chukizo kwangu.

Miandamo ya Mwezi, Sabato na makusanyiko ya ibada:

siwezi kuvumilia makusanyiko yenu maovu.

¹⁴Sikukuu zenu za Miandamo ya Mwezi,

na sikukuu zenu zilizoamriwa:

moyo wangu unazichukia kabisa.

Zimekuwa mzigo kwangu,

nimechoka kuzivumilia.

¹⁵Mnaponyoosha mikono yenu katika maombi,

nitaficha macho yangu nisiwaone;

hata mkiomba maombi mengi

sitasikiliza.

“Mikono yenu imejaa damu!

¹⁶“Jiosheni na mkajitakase.

Yaondoeni matendo yenu maovu mbele zangu;

acheni kutenda mabaya.

¹⁷Jifunzeni kutenda mema, tafuteni haki.

Wateteeni waliodhulumiwa.

Teteeni shauri la yatima,

wateteeni wajane.

¹⁸“Njooni basi tujadiliane,”

asema Bwana .

“Ingawa dhambi zenu ni kama rangi nyekundu,

zitakuwa nyeupe kama theluji;

ingawa ni nyekundu sana kama damu,

zitakuwa nyeupe kama sufu.

¹⁹Mkikubali na kutii,

mtakula mema ya nchi,

²⁰lakini mkikataa na kuasi,

mtaangamizwa kwa upanga.”

Kwa kuwa kinywa cha Bwana kimenena.

²¹Tazama jinsi mji uliokuwa mwaminifu

umekuwa kahaba!

Mwanzoni ulikuwa umejaa unyofu,

haki ilikuwa inakaa ndani yake,

lakini sasa ni wauaji!

²²Fedha yenu imekuwa takataka,

divai yenu nzuri imechanganywa na maji.

²³Watawala wenu ni waasi,

rafiki wa wezi,

wote wanapenda rushwa

na kukimbilia hongo.

Hawatetei yatima;

shauri la mjane haliletwi mbele yao.

²⁴Kwa hiyo Bwana, Bwana wa majeshi,

Mwenye Nguvu wa Israeli, asema hivi:

“Lo! Nitapata faraja kutoka kwa adui zangu,

na kujilipizia kisasi kwa watesi wangu.

²⁵Nitauelekeza mkono wangu dhidi yenu,

nitawasafisha takataka zenu zote

na kuwaondolea unajisi wenu wote.

²⁶Nitawarudishia waamuzi wenu kama ilivyokuwa siku za zamani,

nao washauri wenu kama ilivyokuwa mwanzoni.

Baadaye utaitwa,

Mji wa Haki,

Mji Mwaminifu.”

²⁷Sayuni itakombolewa kwa haki,

wale walio ndani yake waliotubu, kwa uaminifu.

²⁸Lakini waasi na wenye dhambi wote wataangamizwa,

nao wanaomwacha Bwana wataangamia.

²⁹“Mtaaibika kwa sababu ya hiyo mialoni

ambayo mlifurahia,

mtafadhaika kwa sababu ya bustani

mlizozichagua.

³⁰Mtakuwa kama mwaloni ulio na majani yanayonyauka,

kama bustani isiyokuwa na maji.

³¹Mtu mwenye nguvu atatoweka kama majani makavu yanayowaka moto,

na kazi yake kama cheche ya moto;

vyote vitaungua pamoja,

wala hakuna wa kuuzima huo moto.”