Unabii dhidi ya Babeli

¹Neno la unabii kuhusu Jangwa kando ya Bahari:

Kama upepo wa kisulisuli unaopita katika nchi hadi kusini,

mshambuliaji anakuja kutoka jangwani,

kutoka nchi inayotisha.

²Nimeoneshwa maono ya kutisha:

Msaliti anasaliti, mteka nyara anateka nyara.

Elamu, shambulia! Umedi, zingira kwa jeshi!

Nitakomesha huzuni zote alizosababisha.

³Kwa sababu hii, mwili wangu umeteswa na maumivu,

maumivu makali ya ghafula yamenishika,

kama yale ya mwanamke mwenye uchungu wa kuzaa.

Nimeduwazwa na lile ninalolisikia,

nimeshangazwa na lile ninaloliona.

⁴Moyo wangu unababaika,

woga unanifanya nitetemeke,

gizagiza la jioni nililolitamani sana,

limekuwa hofu kuu kwangu.

⁵Wanaandaa meza,

wanatandaza mazulia,

wanakula, wanakunywa!

Amkeni, enyi maafisa,

zitieni ngao mafuta!

⁶Hili ndilo Bwana analoniambia:

“Nenda, weka mlinzi,

na atoe taarifa ya kile anachokiona.

⁷Anapoona magari ya vita

pamoja na kundi la farasi,

wapanda punda au wapanda ngamia,

na awe macho, awe macho kikamilifu.”

⁸Naye mlinzi alipaza sauti,

“Mchana baada ya mchana, bwana wangu,

ninasimama katika mnara wa ulinzi,

kila usiku ninakaa mahali pangu nilipoamriwa.

⁹Tazama, yuaja mtu anayepanda gari la vita

pamoja na kundi la farasi.

Naye anajibu:

‘Babeli umeanguka, umeanguka!

Vinyago vyote vya miungu yake

vimelala chini vikiwa vimevunjwa!’ ”

¹⁰Ee watu wangu, mliopondwa kwenye sakafu ya kupuria,

ninawaambia kile nilichokisikia

kutoka kwa Bwana wa majeshi,

kutoka kwa Mungu wa Israeli.

Unabii dhidi ya Edomu

¹¹Neno la unabii kuhusu Duma:

Mtu fulani ananiita kutoka Seiri,

“Mlinzi, usiku utaisha lini?

Mlinzi, usiku utaisha lini?”

¹²Mlinzi anajibu,

“Asubuhi inakuja, lakini pia usiku.

Ukitaka kuuliza, basi uliza;

na urudi mara tena.”

Unabii dhidi ya Arabia

¹³Neno la unabii kuhusu Arabia:

Enyi misafara ya Wadedani,

mnaopiga kambi katika vichaka vya Arabia,

¹⁴leteni maji kwa wenye kiu,

ninyi mnaoishi Tema,

leteni chakula kwa ajili ya wakimbizi.

¹⁵Wanaukimbia upanga,

upanga uliochomolewa alani,

kutoka upinde uliopindwa,

na kutoka kwa joto la vita.

¹⁶Hili ndilo Bwana analoniambia: “Katika muda wa mwaka mmoja, kama vile mtumishi aliyefungwa na mkataba angeihesabu, majivuno yote ya Kedari yatafikia mwisho.

¹⁷Wanaume wavutao pinde walionusurika, mashujaa wa Kedari, watakuwa wachache.” Bwana , Mungu wa Israeli, amesema.