Mkanda wa kitani

¹Hili ndilo Bwana aliloniambia: “Nenda ununue mkanda wa kitani, ujivike kiunoni mwako, lakini usiuache uguse maji.”

²Kwa hiyo nikanunua mkanda, kama Bwana alivyoniagiza, nikajivika kiunoni.

³Ndipo neno la Bwana likanijia kwa mara ya pili:

⁴“Chukua mkanda ulionunua ambao umeuvaa kiunoni mwako, uende sasa Frati uufiche ndani ya ufa mdogo kwenye mwamba.”

⁵Ndipo nikaenda na kuuficha ule mkanda huko Frati, kama Bwana alivyoniamuru.

⁶Baada ya siku nyingi Bwana akaniambia, “Nenda sasa Frati ukauchukue ule mkanda niliokuambia uufiche huko.”

⁷Hivyo nikaenda Frati na kuuchimbua ule mkanda kutoka pale nilipokuwa nimeuficha, lakini sasa ulikuwa umeharibika na haufai tena kabisa.

⁸Ndipo neno la Bwana likanijia:

⁹“Hili ndilo asemalo Bwana : ‘Vivyo hivyo ndivyo nitakavyokiharibu kiburi cha Yuda na kiburi kikuu cha Yerusalemu.

¹⁰Watu hawa waovu, wanaokataa kusikiliza maneno yangu, wafuatao ukaidi wa mioyo yao na kufuata miungu mingine wakiitumikia na kuiabudu, watakuwa kama mshipi huu ambao haufai kabisa!

¹¹Kwa maana kama vile mshipi ufungwavyo kiunoni mwa mtu, ndivyo nilivyoifunga nyumba yote ya Israeli na nyumba yote ya Yuda,’ asema Bwana , ‘ili wawe watu wangu kwa ajili ya utukufu wangu, sifa na heshima yangu. Lakini hawajasikiliza.’

Viriba vya mvinyo

¹²“Waambie: ‘Hili ndilo Bwana , Mungu wa Israeli, asemalo: kila kiriba inapasa kijazwe mvinyo.’ Wakikuambia, ‘Kwani hatujui kwamba kila kiriba inapasa kijazwe mvinyo?’

¹³Uwaambie, ‘Hili ndilo asemalo Bwana : nitawajaza ulevi wote wanaoishi katika nchi hii, pamoja na wafalme wanaoketi kwenye kiti cha ufalme cha Daudi, makuhani, manabii na wakaaji wote wa Yerusalemu.

¹⁴Nitawagombanisha kila mmoja na mwenzake, baba na wana wao, asema Bwana . Sitawarehemu wala kuwahurumia ili niache kuwaangamiza.’ ”

Tishio la kutekwa

¹⁵Sikieni na mzingatie,

msiwe na kiburi,

kwa kuwa Bwana amenena.

¹⁶Mpeni utukufu Bwana Mungu wenu,

kabla hajaleta giza,

kabla miguu yenu haijajikwaa

juu ya vilima vitakavyotiwa giza.

Mlitarajia nuru,

lakini ataifanya kuwa giza nene

na kuibadili kuwa huzuni kubwa.

¹⁷Lakini kama hamtasikiliza,

nitalia sirini

kwa ajili ya kiburi chenu;

macho yangu yatalia kwa uchungu,

yakitiririka machozi,

kwa sababu kundi la kondoo la Bwana

litachukuliwa mateka.

¹⁸Mwambie mfalme na mama malkia,

“Shukeni kutoka viti vyenu vya utawala,

kwa kuwa taji zenu za utukufu

zitaanguka kutoka vichwani mwenu.”

¹⁹Miji ya Negebu itafungwa,

wala hapatakuwa na mtu wa kuifungua.

Watu wa Yuda wote watapelekwa uhamishoni,

wakichukuliwa kabisa waende mbali.

²⁰Inua macho yako uone

wale wanaokuja kutoka kaskazini.

Liko wapi lile kundi ulilokabidhiwa,

wale kondoo uliojivunia?

²¹Utasema nini Bwana atakapowaweka juu yako

wale ulioungana nao kama rafiki zako maalum?

Je, hutapatwa na uchungu kama mwanamke

aliye katika uchungu wa kuzaa?

²²Nawe ukijiuliza,

“Kwa nini haya yamenitokea?”

Ni kwa sababu ya dhambi zako nyingi

marinda yako yameraruliwa

na mwili wako umetendewa vibaya.

²³Je, Mkushi aweza kubadili ngozi yake

au chui kubadili madoadoa yake?

Vivyo hivyo, wewe uliyezoea kutenda mabaya

huwezi kufanya mema.

²⁴“Nitawatawanya kama makapi

yapeperushwayo na upepo wa jangwani.

²⁵Hii ndiyo kura yako,

fungu nililokuamulia,”

asema Bwana ,

“kwa sababu umenisahau mimi

na kuamini miungu ya uongo.

²⁶Nitayafunua marinda yako juu ya uso wako

ili aibu yako ionekane,

²⁷yaani uzinzi wako na kulia kwako kulikojaa tamaa kama farasi,

na ukahaba wako usio na aibu!

Nimeyaona matendo yako ya machukizo

juu ya vilima na mashambani.

Ole wako, ee Yerusalemu!

Utaendelea kuwa najisi hadi lini?”