¹“Ikiwa utataka kurudi, ee Israeli,

nirudie mimi,”

asema Mwenyezi Mungu.

“Ikiwa utaondoa sanamu zako za kuchukiza mbele ya macho yangu

na usiendelee kutangatanga,

²ikiwa utaapa katika kweli, kwa haki na kwa unyofu,

‘Hakika kama Mwenyezi Mungu aishivyo,’

ndipo mataifa yatakapobarikiwa naye,

na ndani yake watajitukuza.”

³Hili ndilo asemalo Mwenyezi Mungu kwa watu wa Yuda na kwa Yerusalemu:

“Vunjeni mabonge kwenye mashamba yenu,

wala msipande katikati ya miiba.

⁴Jitahirini katika Mwenyezi Mungu,

tahirini mioyo yenu,

enyi wanaume wa Yuda

na watu wa Yerusalemu,

la sivyo ghadhabu yangu itatoka kwa nguvu

na kuwaka kama moto

kwa sababu ya uovu mliotenda,

ikiwaka pasipo wa kuizima.

Maafa kutoka kaskazini

⁵“Tangaza katika Yuda

na upige mbiu katika Yerusalemu, useme:

‘Piga tarumbeta katika nchi yote!’

Piga kelele na kusema:

‘Kusanyikeni pamoja!

Tukimbilie katika miji yenye ngome!’

⁶Inueni ishara ili kwenda Sayuni!

Kimbilieni usalama pasipo kuchelewa!

Kwa kuwa ninaleta maafa kutoka kaskazini,

maangamizi ya kutisha.”

⁷Simba ametoka nje ya pango lake,

mwangamizi wa mataifa amejipanga.

Ametoka mahali pake

ili aangamize nchi yenu.

Miji yenu itakuwa magofu

pasipo mtu wa kuishi humo.

⁸Hivyo vaeni magunia,

ombolezeni na kulia kwa huzuni,

kwa kuwa hasira kali ya Mwenyezi Mungu

haijaondolewa kwetu.

⁹“Katika siku ile,” asema Mwenyezi Mungu

“mfalme na maafisa watakata tamaa,

makuhani watafadhaika,

na manabii watashangazwa mno.”

¹⁰Ndipo niliposema, “Aa, Bwana Mungu Mwenyezi, hakika umewadanganya watu hawa na Yerusalemu kwa kusema, ‘Mtakuwa na amani,’ wakati upanga uko kooni!”

¹¹Wakati huo watu hawa na Yerusalemu wataambiwa, “Upepo wa moto kutoka miinuko iliyo kame jangwani unavuma kuelekea kwa watu wangu, lakini sio upepo wa kupepeta na kutakasa;

¹²upepo wenye nguvu sana kuliko wa kupepeta na kutakasa utakuja kwa amri yangu. Sasa natangaza hukumu zangu dhidi yao.”

¹³Tazama! Anakuja kama mawingu,

magari yake ya vita yanakuja kama upepo wa kisulisuli,

farasi wake wana mbio kuliko tai.

Ole wetu! Tunaangamia!

¹⁴Ee Yerusalemu, usafishe uovu

kutoka moyoni mwako, uokolewe.

Utaendelea kuficha mawazo yako potovu hadi lini?

¹⁵Sauti inatangaza kutoka Dani,

ikipiga mbiu ya maafa kutoka vilima vya Efraimu.

¹⁶“Waambie mataifa jambo hili,

piga mbiu hii dhidi ya Yerusalemu:

‘Jeshi la kuzingira linakuja kutoka nchi ya mbali,

likipiga kelele za vita dhidi ya miji ya Yuda.

¹⁷Wamemzunguka kama watu walindao shamba,

kwa sababu amefanya uasi dhidi yangu,’ ”

asema Mwenyezi Mungu.

¹⁸“Mwenendo wako na matendo yako mwenyewe

vimeleta haya juu yako.

Hii ndiyo adhabu yako.

Tazama jinsi ilivyo chungu!

Tazama jinsi inavyochoma moyo!”

¹⁹Ee mtima wangu, mtima wangu!

Ninagaagaa kwa maumivu.

Ee maumivu makuu ya moyo wangu!

Moyo wangu umefadhaika ndani yangu,

siwezi kunyamaza,

kwa sababu nimesikia sauti ya tarumbeta;

nimesikia kelele za vita.

²⁰Maafa baada ya maafa,

nchi yote imekuwa magofu.

Kwa ghafula mahema yangu yameangamizwa,

makazi yangu kwa muda mfupi.

²¹Hata lini nitaendelea kuona bendera ya vita

na kusikia sauti za tarumbeta?

²²“Watu wangu ni wapumbavu,

hawanijui mimi.

Ni watoto wasio na akili,

hawana ufahamu.

Ni hodari kutenda mabaya,

hawajui kutenda yaliyo mema.”

²³Niliitazama dunia,

nayo haikuwa na umbo tena ni tupu;

niliziangalia mbingu,

mianga ilikuwa imetoweka.

²⁴Niliitazama milima, nayo ilikuwa ikitetemeka,

vilima vyote vilikuwa vikiyumbayumba.

²⁵Nilitazama, wala hapakuwa na watu;

kila ndege wa angani alikuwa ameruka zake.

²⁶Nilitazama, nayo nchi iliyokuwa imestawi vizuri

imekuwa jangwa,

miji yake yote ilikuwa magofu

mbele za Mwenyezi Mungu,

mbele ya hasira yake kali.

²⁷Hivi ndivyo asemavyo Mwenyezi Mungu:

“Nchi yote itaharibiwa,

ingawa sitaiangamiza kabisa.

²⁸Kwa hiyo dunia itaomboleza

na mbingu zilizo juu zitakuwa giza,

kwa sababu nimesema nami sitarudi nyuma,

nimeamua na wala sitageuka.”

²⁹Kwa sauti ya wapanda farasi na wapiga upinde

kila mji unakimbia.

Baadhi wanakimbilia vichakani,

baadhi wanapanda juu ya miamba.

Miji yote imeachwa,

hakuna aishiye ndani yake.

³⁰Unafanya nini, ewe uliyeharibiwa?

Kwa nini unajivika vazi jekundu

na kuvaa vito vya dhahabu?

Kwa nini unapaka macho yako wanja?

Unajipamba bure.

Wapenzi wako wanakudharau,

wanautafuta uhai wako.

³¹Nasikia kilio kama cha mwanamke

katika uchungu wa kuzaa,

kilio cha uchungu kama cha anayemzaa

mtoto wake wa kwanza:

kilio cha Binti Sayuni akitweta ili aweze kupumua,

akiinua mikono yake, akisema,

“Ole wangu! Ninazimia;

maisha yangu yamekabidhiwa kwa wauaji.”