Ujumbe kuhusu Amoni

¹Kuhusu Waamoni:

Hili ndilo asemalo Bwana :

“Je, Israeli hana wana?

Je, hana warithi?

Kwa nini basi Moleki amechukua milki ya Gadi?

Kwa nini watu wake wanaishi katika miji yake?

²Lakini siku zinakuja,”

asema Bwana ,

“nitakapopiga ukelele wa vita

dhidi ya Raba, mji wa Waamoni;

utakuwa kilima cha magofu,

navyo vijiji vinavyouzunguka

vitateketezwa kwa moto.

Kisha Israeli atawafukuza

wale waliomfukuza,”

asema Bwana .

³“Lia kwa huzuni, ee Heshboni, kwa kuwa Ai umeangamizwa!

Pigeni kelele, enyi wakazi wa Raba!

Vaeni gunia na kuomboleza,

kimbieni hapa na pale ndani ya kuta,

kwa kuwa Moleki ataenda uhamishoni,

yeye pamoja na makuhani na maafisa wake.

⁴Kwa nini unajivunia mabonde yako,

kujivunia mabonde yako yaliyozaa sana?

Ee binti usiye mwaminifu,

unayeutumainia utajiri wako na kusema,

‘Ni nani atakayenishambulia?’

⁵Nitaleta hofu kuu juu yako

kutoka kwa wale wote wanaokuzunguka,”

asema Bwana, Bwana wa majeshi.

“Kila mmoja wenu ataondolewa,

wala hakuna hata mmoja atakayekusanya wakimbizi.

⁶“Lakini hatimaye,

nitarudisha mateka wa Waamoni,”

asema Bwana .

Ujumbe kuhusu Edomu

⁷Kuhusu Edomu:

Hili ndilo asemalo Bwana wa majeshi:

“Je, hakuna tena hekima katika Temani?

Je, shauri limewapotea wenye busara?

Je, hekima yao imechakaa?

⁸Geuka na ukimbie, jifiche katika mapango marefu kabisa,

wewe uishiye Dedani,

kwa kuwa nitaleta maafa juu ya Esau

wakati nitakapomwadhibu.

⁹Je, kama wachuma zabibu wangekuja kwako,

wasingebakiza zabibu chache?

Kama wezi wangekujia usiku,

je, si wangeiba tu kiasi ambacho wangehitaji?

¹⁰Lakini nitamvua Esau nguo abaki uchi,

nitayafunua maficho yake,

ili asiweze kujificha.

Watoto wake, jamaa na majirani wataangamia,

naye hatakuwepo tena.

¹¹Waache yatima wako; nitayalinda maisha yao.

Wajane wako pia

wanaweza kunitumaini mimi.”

¹²Hili ndilo asemalo Bwana : “Kama wasiostahili kukinywea kikombe ni lazima wakinywe, kwa nini wewe usiadhibiwe? Hutakwepa kuadhibiwa, ni lazima ukinywe.

¹³Ninaapa kwa nafsi yangu,” asema Bwana , “kwamba Bosra utakuwa magofu na kitu cha kutisha, cha aibu na cha kulaania; miji yake yote itakuwa magofu milele.”

¹⁴Nimesikia ujumbe kutoka kwa Bwana :

Mjumbe alitumwa kwa mataifa kusema,

“Jikusanyeni ili kuushambulia!

Inukeni kwa ajili ya vita!”

¹⁵“Sasa nitakufanya mdogo miongoni mwa mataifa,

uliyedharauliwa miongoni mwa watu.

¹⁶Vitisho vyako na kiburi cha moyo wako

vimekudanganya,

wewe unayeishi katika majabali ya miamba,

wewe unayedumu katika miinuko ya kilima.

Ujapojenga kiota chako juu sana kama cha tai,

nitakushusha chini kutoka huko,”

asema Bwana .

¹⁷“Edomu atakuwa kitu cha kutisha;

wote wapitao karibu

watashangaa na kuzomea

kwa sababu ya majeraha yake yote.

¹⁸Kama vile Sodoma na Gomora zilivyoangamizwa,

pamoja na miji iliyokuwa jirani nayo,”

asema Bwana ,

“vivyo hivyo hakuna mtu yeyote atakayeishi humo.

Naam, hakuna mtu yeyote atakayekaa humo.

¹⁹“Kama simba anayepanda kutoka vichaka vya Yordani

kuja kwenye nchi ya malisho mengi,

ndivyo nitakavyomfukuza Edomu kutoka nchi yake ghafula.

Ni nani aliye mteule nitakayemweka kwa ajili ya jambo hili?

Ni nani aliye kama mimi,

na ni nani awezaye kunipinga?

Tena ni mchungaji yupi awezaye

kusimama kinyume nami?”

²⁰Kwa hiyo, sikia kile Bwana alichokipanga dhidi ya Edomu,

kile alichokusudia dhidi ya wale wanaoishi Temani:

Aliye mchanga katika kundi ataburutwa mbali;

yeye ataharibu kabisa malisho yao kwa sababu yao.

²¹Kwa sauti ya anguko lao, dunia itatetemeka.

Kilio chao kitasikika hadi Bahari ya Shamu.

²²Tazama! Tai atapaa juu angani na kuruka chini kwa ghafula,

akitandaza mabawa yake juu ya Bosra.

Katika siku hiyo, mioyo ya mashujaa wa Edomu

itakuwa kama moyo wa mwanamke katika uchungu wa kuzaa.

Ujumbe kuhusu Dameski

²³Kuhusu Dameski:

“Hamathi na Arpadi imetahayarika,

kwa kuwa wamesikia habari mbaya.

Wamevunjika moyo na wametaabika

kama bahari iliyochafuka.

²⁴Dameski amedhoofika,

amegeuka na kukimbia,

hofu ya ghafula imemkamata sana;

amepatwa na uchungu na maumivu,

maumivu kama ya mwanamke katika uchungu wa kuzaa.

²⁵Kwa nini mji unaosifika haujaachwa,

mji wenye sifa, na wa furaha yangu?

²⁶Hakika, vijana wake wanaume wataanguka barabarani;

askari wake wote watanyamazishwa siku hiyo,”

asema Bwana wa majeshi.

²⁷“Nitatia moto kuta za Dameski;

utaangamiza ngome za Ben-Hadadi.”

Ujumbe kuhusu Kedari na Hazori

²⁸Kuhusu Kedari na falme za Hazori, ambazo Nebukadneza mfalme wa Babeli alizishambulia:

Hili ndilo asemalo Bwana :

“Inuka, ushambulie Kedari

na kuwaangamiza watu wa mashariki.

²⁹Mahema yao na makundi yao ya kondoo yatachukuliwa;

vibanda vyao vitatwaliwa,

pamoja na mali yao yote na ngamia wao.

Watu watawapigia kelele,

‘Hofu kuu iko kila upande!’

³⁰“Kimbieni haraka!

Kaeni kwenye mapango marefu sana, ninyi mnaoishi Hazori,”

asema Bwana .

“Nebukadneza, mfalme wa Babeli amepanga njama dhidi yenu;

amebuni hila dhidi yenu.

³¹“Inuka na ulishambulie taifa lililostarehe,

linaloishi kwa kujiamini,”

asema Bwana ,

“taifa lisilo na malango wala makomeo;

watu wake wanaishi peke yao.

³²Ngamia wao watakuwa nyara,

nayo mifugo yao itatekwa.

Walio maeneo ya mbali

nitawatawanya pande zote,

nami nitaleta maafa juu yao

kutoka kila upande,”

asema Bwana .

³³“Hazori itakuwa makao ya mbweha,

mahali pa ukiwa milele.

Hakuna atakayeishi humo;

hakuna mtu atakayekaa ndani yake.”

Ujumbe kuhusu Elamu

³⁴Hili ndilo neno la Bwana lililomjia nabii Yeremia kuhusu Elamu, mapema katika utawala wa Sedekia mfalme wa Yuda:

³⁵Hili ndilo asemalo Bwana wa majeshi:

“Tazama, nitavunja upinde wa Elamu,

ulio tegemeo la nguvu zao.

³⁶Nitaleta pepo nne dhidi ya Elamu

toka pande nne za mbingu,

nitawatawanya katika hizo pande nne,

wala hapatakuwa na taifa

ambalo watu wa Elamu waliofukuzwa

hawataenda.

³⁷Nitamfadhaisha Elamu mbele ya adui zao,

mbele yao wanaoutafuta uhai wao;

nitaleta maafa juu yao,

naam, hasira yangu kali,”

asema Bwana .

“Nitawafuatia kwa upanga

hadi nitakapowamaliza.

³⁸Nitaweka kiti changu cha enzi huko Elamu

na kumwangamiza mfalme wake na maafisa wake,”

asema Bwana .

³⁹“Lakini nitarudisha mateka wa Elamu

katika siku zijazo,”

asema Bwana .