Ayubu anaendelea

¹“Macho yangu yameona hili lote,

masikio yangu yamesikia na kulielewa.

²Hayo mnayoyajua mimi pia ninayajua;

mimi si mtu duni kuliko ninyi.

³Lakini ninayo shauku ya kuzungumza na Mwenyezi

na kuhojiana shauri langu na Mungu.

⁴Ninyi, hata hivyo, hunipakaza uongo;

ninyi ni matabibu wasiofaa kitu, ninyi nyote!

⁵Laiti wote mngenyamaza!

Kwa kuwa kwenu hilo lingekuwa hekima.

⁶Sikieni sasa hoja yangu;

sikilizeni kusihi kwangu.

⁷Je, mtazungumza kwa uovu kwa niaba ya Mungu?

Je, mtazungumza kwa udanganyifu kwa niaba yake?

⁸Mtamwonesha upendeleo?

Mtamtetea Mungu kwenye mashtaka yake?

⁹Je, ingekuwa vyema

Mungu akiwahoji ninyi?

Je, mngeweza kumdanganya kama ambavyo

mngeweza kuwadanganya wanadamu?

¹⁰Hakika angewakemea

mkiwapendelea watu kwa siri.

¹¹Je, huo ukuu wake haungewatisha ninyi?

Je, hofu yake isingewaangukia ninyi?

¹²Maneno yenu ni mithali za majivu;

utetezi wenu ni ngome za udongo wa mfinyanzi.

¹³“Nyamazeni kimya nipate kusema;

kisha na yanipate yatakayonipata.

¹⁴Kwa nini nijiweke mwenyewe kwenye hatari

na kuyaweka maisha yangu mikononi mwangu?

¹⁵Ingawa ataniua, bado nitamtumaini;

hakika nitazitetea njia zangu mbele zake.

¹⁶Naam, hili litanigeukia kuwa wokovu wangu,

kwa maana hakuna mtu asiyemcha Mungu

atakayethubutu kuja mbele yake!

¹⁷Sikilizeni maneno yangu kwa makini;

nayo masikio yenu yaingize kile nisemacho.

¹⁸Sasa kwa kuwa nimekwisha tayarisha kesi yangu,

ninajua nitahesabiwa kuwa haki.

¹⁹Je, kuna yeyote anayeweza kuleta mashtaka dhidi yangu?

Kama ndivyo, nitanyamaza na nife.

²⁰“Ee Mungu, unijalie tu mimi haya mambo mawili,

nami sitajificha uso wako:

²¹Ondoa mkono wako uwe mbali nami,

uache kuniogofya kwa vitisho vyako.

²²Niite kwenye shauri nami nitajibu,

au niache niseme, nawe upate kujibu.

²³Ni makosa na dhambi ngapi nilizotenda?

Nioneshe kosa langu na dhambi yangu.

²⁴Kwa nini kuuficha uso wako

na kunihesabu mimi kuwa adui yako?

²⁵Je, utaliadhibu jani lipeperushwalo na upepo?

Je, utayasaka makapi makavu?

²⁶Kwa kuwa unaandika mambo machungu dhidi yangu

na kunifanya nizirithi dhambi za ujana wangu.

²⁷Umeifunga miguu yangu kwenye pingu.

Unazichunga kwa makini njia zangu zote

kwa kutia alama kwenye nyayo za miguu yangu.

²⁸“Hivyo mwanadamu huangamia kama kitu kilichooza,

kama vazi lililoliwa na nondo.