Ayubu anajibu: Waovu mara nyingi huenda bila kuadhibiwa

¹Ndipo Ayubu akajibu:

²“Yasikilizeni maneno yangu kwa makini;

hii na iwe faraja mnayonipa mimi.

³Nivumilieni ninapozungumza,

nami nikishazungumza, endeleeni kunidhihaki.

⁴“Je, kwani malalamiko yangu yanaelekezwa kwa mwanadamu?

Kwa nini nisikose subira?

⁵Niangalieni mkastaajabu;

mkaweke mkono juu ya vinywa vyenu.

⁶Ninapowaza kuhusu hili, ninaogopa,

nao mwili wangu unatetemeka.

⁷Kwa nini waovu wanaendelea kuishi,

wakifikia umri wa uzee na kuendelea kuwa na nguvu?

⁸Huwaona watoto wao wakithibitika

wakiwa wamewazunguka,

wazao wao mbele za macho yao.

⁹Nyumba zao zi salama wala hakuna hofu;

fimbo ya Mungu haiko juu yao.

¹⁰Madume yao ya ngʼombe huvyaza bila kushindwa kamwe;

ngʼombe wao huzaa wala hawaharibu mimba.

¹¹Huwatoa watoto wao nje kama kundi;

wadogo wao huchezacheza.

¹²Huimba nyimbo kwa matari na kwa kinubi,

nao huifurahia sauti ya filimbi.

¹³Huitumia miaka yao katika mafanikio

nao hushuka kaburini kwa amani.

¹⁴Lakini humwambia Mungu, ‘Tuache sisi!’

Hatuna haja ya kufahamu njia zako.

¹⁵Mwenyezi ni nani hata tumtumikie?

Tutapata faida gani kumwomba?

¹⁶Lakini kufanikiwa kwao hakupo mikononi mwao wenyewe,

hivyo najitenga mbali na ushauri wa waovu.

¹⁷“Lakini ni mara ngapi taa ya waovu huzimwa?

Ni mara ngapi maafa huwajia,

yale yawapatayo ambayo Mungu

huwapangia katika hasira yake?

¹⁸Ni mara ngapi huwa kama majani makavu mbele ya upepo,

kama makapi yachukuliwayo na dhoruba?

¹⁹Imesemekana, ‘Mungu huiweka akiba adhabu ya mtu

kwa ajili ya wanawe.’

Mungu na amlipe mtu mwenyewe,

ili apate kulijua!

²⁰Macho yake mwenyewe na yaone maangamizi yake;

yeye na ainywe ghadhabu ya Mwenyezi.

²¹Kwani anajali nini kuhusu jamaa anayoiacha nyuma,

miezi yake aliyopangiwa ifikapo mwisho?

²²“Je, yuko mtu yeyote awezaye kumfundisha Mungu maarifa,

iwapo yeye ndiye ahukumuye hata walio juu ya wote?

²³Mtu mmoja hufa akiwa na nguvu zake kamili,

akiwa salama na mwenye amani,

²⁴mwili wake ukiwa umenawiri,

nayo mifupa yake ikiwa imejaa mafuta.

²⁵Mtu mwingine hufa katika uchungu wa nafsi,

akiwa hajafurahia kamwe jambo lolote zuri.

²⁶Hao wote hulala mavumbini,

nao mabuu huwafunika wote.

²⁷“Ninayajua kikamilifu yale mnayoyafikiri,

mipango ambayo kwayo mngenitendea mabaya.

²⁸Mwasema, ‘Iko wapi sasa nyumba ya huyo mtu mkuu,

mahema ambayo watu waovu walikaa?’

²⁹Je, hamkuwahi kuwauliza hao wanaosafiri?

Je, hamkutafakari taarifa zao:

³⁰kwamba mtu mwovu huepushwa kutoka siku ya maafa,

kwamba huokolewa kutoka siku ya ghadhabu?

³¹Ni nani hulaumu matendo yake mbele ya uso wake?

Ni nani ampatilizaye kwa yale aliyoyatenda?

³²Hupelekwa kaburini,

nao ulinzi ukawekwa kwenye kaburi lake.

³³Udongo ulio bondeni ni mtamu kwake;

watu wote watamfuata,

nao umati wa watu wasiohesabika wamemtangulia.

³⁴“Hivyo ninyi mnawezaje kunifariji kwa upuzi wenu?

Hakuna kilichosalia cha majibu yenu isipokuwa uongo!”