Ayubu anaendelea

¹“Je, mwanadamu hana kazi ngumu duniani?

Siku zake si kama zile za mtu aliyeajiriwa?

²Kama mtumwa anavyovionea shauku vivuli vya jioni,

au mtu aliyeajiriwa anavyoungojea mshahara wake,

³ndivyo nilivyogawiwa miezi ya ubatili,

nami nimeandikiwa huzuni usiku hata usiku.

⁴Nilalapo ninawaza, ‘Itachukua muda gani kabla sijaamka?’

Usiku huwa mrefu, nami najigeuzageuza hadi mapambazuko.

⁵Mwili wangu umevikwa mabuu na uchafu,

ngozi yangu imetumbuka na kutunga usaha.

Ayubu amlilia Mungu

⁶“Siku zangu zinapita upesi kuliko mtande wa kufuma,

nazo zinafikia mwisho wake bila matumaini.

⁷Kumbuka, Ee Mungu, maisha yangu ni kama pumzi;

macho yangu kamwe hayataona tena raha.

⁸Lile jicho linaloniona sasa halitaniona tena;

utanitafuta, wala sitakuwepo.

⁹Kama vile wingu liondokavyo na kutoweka,

vivyo hivyo yeye ashukaye kaburini harudi tena.

¹⁰Kamwe harudi tena nyumbani mwake;

wala mahali pake hapatamjua tena.

¹¹“Kwa hiyo sitanyamaza;

nitanena kutokana na maumivu makuu ya roho yangu,

nitalalama kwa uchungu wa nafsi yangu.

¹²Je, mimi ni bahari, au yule mnyama mkubwa wa baharini,

hata uniweke chini ya ulinzi?

¹³Ninapofikiri kwamba kitanda changu kitanifariji,

nacho kiti changu cha fahari kitapunguza malalamiko yangu,

¹⁴ndipo wanitisha kwa ndoto

na kunitia hofu kwa maono,

¹⁵hivyo ninachagua kujinyonga na kufa,

kuliko huu mwili wangu.

¹⁶Ninayachukia maisha yangu; nisingetamani kuendelea kuishi.

Niache; siku zangu ni ubatili.

¹⁷“Mwanadamu ni kitu gani hata umjali kiasi hiki,

kwamba unamtia sana maanani,

¹⁸kwamba unamwangalia kila asubuhi

na kumjaribu kila wakati?

¹⁹Je, hutaacha kamwe kunitazama,

au kuniacha japo kwa kitambo kidogo tu?

²⁰Ikiwa nimetenda dhambi, nimekufanyia nini,

Ewe mlinzi wa wanadamu?

Kwa nini umeniweka niwe shabaha yako?

Je, nimekuwa mzigo kwako?

²¹Kwa nini husamehi makosa yangu

na kuachilia dhambi zangu?

Kwa kuwa hivi karibuni nitalala mavumbini;

nawe utanitafuta, wala sitakuwepo.”