Maombi ya Yona na kuokolewa

¹Akiwa ndani ya tumbo la samaki, Yona alimwomba Bwana Mungu wake.

²Akasema:

“Katika shida yangu nalimwita Bwana ,

naye akanijibu.

Kutoka kina cha kaburi niliomba msaada,

nawe ukasikiliza kilio changu.

³Ulinitupa kwenye kilindi,

ndani kabisa ya moyo wa bahari,

mikondo ya maji ilinizunguka;

mawimbi yako yote na viwimbi

vilipita juu yangu.

⁴Nikasema, ‘Nimefukuziwa

mbali na uso wako,

hata hivyo nitatazama tena

kuelekea Hekalu lako takatifu.’

⁵Maji yaliyonimeza yalinitisha,

kilindi kilinizunguka;

mwani ulijisokota kichwani pangu.

⁶Nilizama chini sana hata pande za mwisho za milima,

makomeo ya hiyo nchi yalinifungia hata milele.

Lakini uliuleta uhai wangu kutoka shimoni,

Ee Bwana Mungu wangu.

⁷“Uhai wangu ulipokuwa unatoka,

nilikukumbuka wewe, Bwana ,

nayo maombi yangu yalikufikia wewe,

katika Hekalu lako takatifu.

⁸“Wale watu wanaoshikilia sanamu batili

hupoteza neema yao.

⁹Lakini mimi nitakutolea dhabihu,

kwa sauti za shukrani na shangwe.

Lile nililowekea nadhiri nitalitimiza.

Wokovu watoka kwa Bwana .”

¹⁰Basi Bwana akamwamuru yule samaki, naye akamtapika Yona katika nchi kavu.