¹Kumbuka, Ee Bwana , yaliyotupata,

tazama, nawe uione aibu yetu.

²Urithi wetu umegeuziwa kwa wageni,

na nyumba zetu kwa wageni.

³Tumekuwa yatima wasio na baba,

mama zetu wamekuwa kama wajane.

⁴Ni lazima tununue maji tunayokunywa,

kuni zetu zapatikana tu kwa kununua.

⁵Wanaotufuatilia wapo kwenye visigino vyetu,

tumechoka na hakuna pumziko.

⁶Tumejitolea kwa Misri na Ashuru

tupate chakula cha kutosha.

⁷Baba zetu walitenda dhambi na hawapo tena,

na sisi tunachukua adhabu yao.

⁸Watumwa wanatutawala

na hakuna wa kutuokoa mikononi yao.

⁹Tunapata chakula chetu kwa kuhatarisha maisha yetu

kwa sababu ya upanga jangwani.

¹⁰Ngozi yetu ina joto kama tanuru,

kutokana na fadhaa ya njaa.

¹¹Wanawake wametendwa jeuri katika Sayuni,

na mabikira katika miji ya Yuda.

¹²Wakuu wametungikwa juu kwa mikono yao,

wazee hawapewi heshima.

¹³Vijana wanataabika kwenye mawe ya kusagia,

wavulana wanayumbayumba chini ya mizigo ya kuni.

¹⁴Wazee wameondoka katika lango la mji,

vijana wameacha kuimba nyimbo zao.

¹⁵Furaha imeondoka mioyoni mwetu,

kucheza kwetu kumegeuka maombolezo.

¹⁶Taji limeanguka kutoka kichwani petu.

Ole wetu, kwa maana tumetenda dhambi!

¹⁷Kwa sababu hiyo, mioyo yetu inazimia,

kwa sababu ya hayo, macho yetu yamefifia,

¹⁸kwa sababu Mlima Sayuni umekaa ukiwa,

na mbweha wanatembea juu yake.

¹⁹Wewe, Ee Bwana unatawala milele,

kiti chako cha enzi chadumu kizazi hadi kizazi.

²⁰Kwa nini watusahau siku zote?

Kwa nini umetuacha kwa muda mrefu?

²¹Turudishe kwako mwenyewe, Ee Bwana ,

ili tupate kurudi.

Zifanye mpya siku zetu kama siku za kale,

²²isipokuwa uwe umetukataa kabisa

na umetukasirikia pasipo kipimo.