Kuchipuka kwa fimbo ya Haruni

¹Bwana akamwambia Musa,

²“Sema na Waisraeli, na ujipatie fimbo kumi na mbili kutoka kwao, moja kutoka kwa kila mmoja wa viongozi wa makabila ya baba zao. Andika jina la kila mtu kwenye fimbo yake.

³Kwenye fimbo ya Lawi andika jina la Haruni, kwa maana ni lazima iwepo fimbo moja kwa kila kiongozi kwa ajili ya kila kabila la baba zao.

⁴Ziweke hizo fimbo ndani ya Hema la Kukutania mbele ya Sanduku la Ushuhuda, mahali nikutanapo nawe.

⁵Fimbo ya mtu nitakayemchagua itachipuka, nami mwenyewe nitayakomesha haya manungʼuniko ya mara kwa mara ya Waisraeli dhidi yako.”

⁶Hivyo Musa akasema na Waisraeli, nao viongozi wao wakampa fimbo kumi na mbili, fimbo moja kwa ajili ya kila kabila la baba zao, nayo fimbo ya Haruni ikiwa miongoni mwa hizo.

⁷Musa akaziweka hizo fimbo mbele za Bwana ndani ya Hema la Ushuhuda.

⁸Siku iliyofuata Musa aliingia kwenye Hema la Ushuhuda akaona ile fimbo ya Haruni ambayo iliwakilisha jamaa ya Lawi haikuwa tu imechipuka, bali pia ilikuwa imetoa machipukizi, kuchanua maua na kuzaa malozi.

⁹Ndipo Musa akaleta zile fimbo zote kwa Waisraeli wote kutoka mbele za Bwana . Wakaziangalia, na kila mtu akaichukua fimbo yake mwenyewe.

¹⁰Bwana akamwambia Musa, “Rudisha fimbo ya Haruni mbele ya Sanduku la Ushuhuda, ili ihifadhiwe kama alama kwa waasi. Hili litakomesha manungʼuniko yao dhidi yangu, ili wasife.”

¹¹Musa akafanya kama Bwana alivyomwamuru.

¹²Waisraeli wakamwambia Musa, “Tutakufa! Tumepotea, sote tumepotea!

¹³Yeyote akaribiaye Maskani ya Bwana atakufa. Je, sisi sote tutakufa?”