¹Maono ya Obadia.

Hili ndilo asemalo Bwana Mwenyezi kuhusu Edomu:

Tumesikia ujumbe kutoka kwa Bwana :

Mjumbe alitumwa kwa mataifa kusema,

“Inukeni, twendeni tukapigane vita dhidi yake.”

²“Tazama, nitakufanya mdogo miongoni mwa mataifa,

utadharauliwa kabisa.

³Kiburi cha moyo wako kimekudanganya,

wewe unayeishi katika mapango ya miamba

na kufanya makao yako juu,

wewe unayejiambia mwenyewe,

‘Ni nani awezaye kunishusha chini?’

⁴Ingawa unapaa juu kama tai

na kufanya kiota chako kati ya nyota,

nitakushusha chini kutoka huko,”

asema Bwana .

⁵“Ikiwa wezi wangekuja kwako,

ikiwa wanyangʼanyi wangekujia usiku:

Lo! Tazama ni maafa kiasi gani yanakungojea:

je, si wangeiba tu kiasi ambacho wangehitaji?

Kama wachuma zabibu wangekuja kwako,

je, wasingebakiza zabibu chache?

⁶Lakini tazama jinsi Esau atakavyotekwa,

jinsi hazina zake zilizofichwa zitatekwa nyara!

⁷Wote ulioungana nao watakufukuza hadi mpakani,

rafiki zako watakudanganya na kukushinda,

wale wanaokula mkate wako watakutegea mtego,

lakini hutaweza kuugundua.

⁸“Katika siku hiyo,” asema Bwana ,

“je, sitaangamiza wenye hekima wa Edomu,

hao wenye ufahamu katika milima ya Esau?

⁹Ee Temani, mashujaa wako watatiwa hofu,

kila mmoja katika milima ya Esau

ataangushwa chini kwa kuchinjwa.

¹⁰Kwa sababu ya jeuri uliyofanya dhidi ya ndugu yako Yakobo,

aibu itakufunika;

utaangamizwa milele.

¹¹Siku ile ulisimama mbali ukiangalia

wakati wageni walipojichukulia utajiri wake,

na watu wa nchi nyingine walipoingia malango yake

wakipiga kura kwa ajili ya Yerusalemu,

ulikuwa kama mmoja wao.

¹²Usingemdharau ndugu yako

katika siku ya msiba wake,

wala kufurahia juu ya watu wa Yuda

katika siku ya maangamizi yao,

wala kujigamba sana

katika siku ya taabu yao.

¹³Usingeingia katika malango ya watu wangu

katika siku ya maafa yao,

wala kuwadharau katika janga lao

katika siku ya maafa yao,

wala kunyangʼanya mali yao

katika siku ya maafa yao.

¹⁴Usingengoja kwenye njia panda

na kuwaua wakimbizi wao,

wala kuwatoa watu wake waliosalia

katika siku ya shida yao.

¹⁵“Siku ya Bwana iko karibu

kwa mataifa yote.

Kama ulivyotenda, nawe utatendewa vivyo hivyo,

matendo yako yatakurudia juu ya kichwa chako.

¹⁶Kama vile ulivyokunywa juu ya mlima wangu mtakatifu,

vivyo hivyo mataifa yote watakunywa mfululizo;

watakunywa na kunywa,

nao watatoweka kana kwamba hawajawahi kuwepo.

¹⁷Lakini katika Mlima Sayuni kutakuwa na wale watakaookoka;

nao utakuwa mtakatifu,

nayo nyumba ya Yakobo

itamiliki urithi wake.

¹⁸Nyumba ya Yakobo itakuwa moto,

na nyumba ya Yusufu itakuwa mwali wa moto;

nayo nyumba ya Esau itakuwa bua kavu,

nao wataiwasha moto na kuiteketeza.

Hakutakuwa na watakaosalimika

kutoka nyumba ya Esau.”

Bwana amesema.

¹⁹Watu kutoka nchi ya Negebu

wataimiliki milima ya Esau,

na watu kutoka Shefela

wataimiliki nchi ya Wafilisti.

Watayamiliki mashamba ya Efraimu na Samaria,

naye Benyamini atamiliki Gileadi.

²⁰Kundi la Waisraeli walio uhamishoni Kanaani

watarudi na kuimiliki nchi hadi Sarepta.

Walio uhamishoni Sefaradi kutoka Yerusalemu

wataimiliki miji ya Negebu.

²¹Waokoaji watakwea juu ya Mlima Sayuni

kutawala milima ya Esau.

Nao ufalme utakuwa wa Bwana .