¹Mtu mwovu hukimbia ingawa hakuna yeyote anayemfukuza,

bali wenye haki ni wajasiri kama simba.

²Nchi inapokuwa na uasi,

inakuwa na viongozi wengi,

bali kiongozi mwenye ufahamu na maarifa

hudumisha utaratibu.

³Mtawala anayewadhulumu maskini,

ni kama mvua ya dhoruba inayoharibu mazao yote.

⁴Wale wanaoacha sheria huwasifu waovu,

bali wale wanaotii sheria huwapinga.

⁵Wapotovu hawaelewi haki,

bali wale wanaomtafuta Bwana wanaielewa kikamilifu.

⁶Afadhali maskini ambaye mwenendo wake hauna lawama,

kuliko tajiri ambaye njia zake ni potovu.

⁷Yeye anayetii sheria ni mwana mwenye ufahamu,

bali rafiki wa walafi humwaibisha baba yake.

⁸Yeye aongezaye utajiri wake kwa riba kubwa mno

hukusanya kwa ajili ya mwingine,

ambaye atawahurumia maskini.

⁹Mtu yeyote akikataa kusikia sheria,

hata maombi yake ni chukizo.

¹⁰Yeye anayemwongoza mwenye haki kwenye mapito mabaya,

ataanguka kwenye mtego wake mwenyewe,

bali wasio na lawama watapokea urithi mwema.

¹¹Mtu tajiri anaweza kuwa na hekima machoni pake mwenyewe,

bali mtu maskini mwenye busara

humtambua alivyodanganyika.

¹²Mwenye haki ashindapo, kuna furaha kubwa,

bali waovu watawalapo, watu hujificha.

¹³Yeye afichaye dhambi zake hatafanikiwa,

bali yeyote aziungamaye na kuziacha hupata rehema.

¹⁴Amebarikiwa mtu ambaye siku zote humcha Bwana ,

bali yeye afanyaye moyo wake kuwa mgumu

huanguka kwenye taabu.

¹⁵Kama simba angurumaye au dubu ashambuliaye,

ndivyo alivyo mtu mwovu anayetawala wanyonge.

¹⁶Mtawala dhalimu hana akili,

bali yeye achukiaye mapato ya udhalimu

atafurahia maisha marefu.

¹⁷Mtu mwenye kusumbuliwa na hatia ya kuua

atakuwa mtoro hadi kufa;

mtu yeyote asimsaidie.

¹⁸Yeye ambaye mwenendo wake hauna lawama

hulindwa salama,

bali yeye ambaye njia zake ni potovu

ataanguka ghafula.

¹⁹Yeye alimaye shamba lake atakuwa na chakula tele,

bali yule afuataye mambo ya upuzi atakuwa na umaskini wa kumtosha.

²⁰Mtu mwaminifu atabarikiwa sana,

bali yeye atamaniye kupata utajiri kwa haraka

hataacha kuadhibiwa.

²¹Kuonesha upendeleo si vizuri,

hata hivyo mtu atafanya kosa kwa kipande cha mkate.

²²Mtu mchoyo ana tamaa ya kupata utajiri,

naye hana habari kuwa umaskini unamngojea.

²³Yeye amkemeaye mtu mwishoni hupata kibali zaidi,

kuliko mwenye maneno ya kusifu isivyostahili.

²⁴Yeye amwibiaye babaye au mamaye

na kusema, “Si kosa,”

yeye ni mwenzi wa yule aharibuye.

²⁵Mtu mwenye tamaa huchochea fitina,

bali yule amtegemeaye Bwana atafanikiwa.

²⁶Yeye ajitumainiaye mwenyewe ni mpumbavu,

bali yeye atembeaye katika hekima hulindwa salama.

²⁷Yeye ampaye maskini

hatapungukiwa na kitu chochote,

bali yeye awafumbiaye maskini macho

hupata laana nyingi.

²⁸Wakati waovu wanatawala,

watu huenda mafichoni,

bali waovu wanapoangamia,

wenye haki hufanikiwa.