Zaburi 100

Dunia yote yaitwa kumsifu Mwenyezi Mungu

¹Mpigieni Mwenyezi Mungu kelele za shangwe, dunia yote.

²Mwabuduni Mwenyezi Mungu kwa furaha;

njooni mbele zake kwa nyimbo za shangwe.

³Jueni kwamba Mwenyezi Mungu ndiye Mungu.

Yeye ndiye alituumba, sisi tu mali yake;

sisi tu watu wake,

kondoo wa malisho yake.

⁴Ingieni malangoni mwake kwa shukrani

na katika nyua zake kwa kusifu,

mshukuruni yeye na kulisifu jina lake.

⁵Kwa maana Mwenyezi Mungu ni mwema

na fadhili zake zadumu milele;

uaminifu wake unadumu kwa vizazi vyote.