Zaburi 101

Ahadi ya kuishi kwa uadilifu na kwa haki

¹Nitaimba kuhusu upendo wako na haki yako;

kwako wewe, Ee Mwenyezi Mungu, nitaimba sifa.

²Nitazingatia kuishi maisha yasiyo na lawama:

utakuja kwangu lini?

Nitatembea nyumbani mwangu

kwa moyo usio na lawama.

³Sitaweka mbele ya macho yangu

kitu kiovu.

Ninayachukia matendo ya watu wasio na imani;

hawatashikamana nami.

⁴Moyo wa ukaidi utakuwa mbali nami;

nitajitenga na kila ubaya.

⁵Kila amsingiziaye jirani yake kwa siri,

huyo nitamnyamazisha;

mwenye macho ya dharau na moyo wa kiburi

huyo sitamvumilia.

⁶Macho yangu yatawaelekea waaminifu katika nchi,

ili waweze kuishi pamoja nami;

yeye ambaye moyo wake hauna lawama

atanitumikia.

⁷Mdanganyifu hatakaa

nyumbani mwangu,

yeye asemaye kwa uongo

hatasimama mbele yangu.

⁸Kila asubuhi nitawanyamazisha

waovu wote katika nchi;

nitamkatilia mbali kila mtenda maovu

kutoka mji wa Mwenyezi Mungu.