Zaburi 111

Sifa za Mwenyezi Mungu kwa matendo ya ajabu

¹Msifuni Mwenyezi Mungu.[#111:1 kwa Kiebrania ni Hallelu Yah.]

Nitamtukuza Mwenyezi Mungu kwa moyo wangu wote,

katika baraza la wanyofu na katika kusanyiko.

²Kazi za Mwenyezi Mungu ni kuu,

wote wanaopendezwa nazo huzitafakari.

³Kazi zake zimejaa fahari na utukufu,

haki yake hudumu daima.

⁴Amefanya maajabu yake yakumbukwe,

Mwenyezi Mungu ni mwenye neema na huruma.

⁵Huwapa chakula wale wanaomcha,

hulikumbuka agano lake milele.

⁶Amewaonesha watu wake uwezo wa kazi zake,

akiwapa nchi za mataifa mengine.

⁷Kazi za mikono yake ni za uaminifu na haki,

mausia yake yote ni ya kuaminika.

⁸Zinadumu milele na milele,

zikifanyika kwa uaminifu na unyofu.

⁹Aliwapa watu wake ukombozi,

aliamuru agano lake milele:

jina lake ni takatifu na la kuogopwa.

¹⁰Kumcha Mwenyezi Mungu ndicho chanzo cha hekima,

wote wanaozifuata amri zake wana busara.

Sifa zake zadumu milele.