Zaburi 113

Kumsifu Mwenyezi Mungu kwa wema wake

¹Msifuni Mwenyezi Mungu.[#113:1 kwa Kiebrania ni Hallelu Yah ; pia 113:9.]

Enyi watumishi wa Mwenyezi Mungu msifuni,

lisifuni jina la Mwenyezi Mungu.

²Jina la Mwenyezi Mungu na lisifiwe,

sasa na hata milele.

³Kuanzia mawio ya jua hadi machweo yake,

jina la Mwenyezi Mungu linapaswa kusifiwa.

⁴Mwenyezi Mungu ametukuka juu ya mataifa yote,

utukufu wake juu ya mbingu.

⁵Ni nani aliye kama Mwenyezi Mungu, Mungu wetu,

Yule aliyeketi kwenye kiti cha enzi huko juu,

⁶ambaye huinama atazame chini

aone mbingu na nchi?

⁷Huwainua maskini kutoka mavumbini,

na kuwanyanyua wahitaji

kutoka lundo la majivu,

⁸huwaketisha pamoja na wakuu,

pamoja na wakuu wa watu wake.

⁹Humjalia mwanamke tasa kutulia nyumbani mwake,

akiwa mama watoto mwenye furaha.

Msifuni Mwenyezi Mungu.