Zaburi 119

Sifa za Torati ya Mwenyezi Mungu

¹Heri wale walio waadilifu katika njia zao,

wanaoenenda katika Torati ya Mwenyezi Mungu.

²Heri wale wanaozishika shuhuda zake,

wanaomtafuta kwa moyo wao wote.

³Wasiofanya lolote lililo baya,

wanaoenenda katika njia zake.

⁴Umetoa maagizo yako

ili tuyatii kwa ukamilifu.

⁵Laiti mwenendo wangu ungekuwa imara

katika kuyatii maagizo yako!

⁶Hivyo mimi sitaaibishwa

ninapozingatia amri zako zote.

⁷Nitakusifu kwa moyo mnyofu

ninapojifunza sheria zako za haki.

⁸Nitayatii maagizo yako;

usiniache kabisa.

⁹Kijana aisafishe njia yake jinsi gani?

Ni kwa kutii, akilifuata neno lako.

¹⁰Ninakutafuta kwa moyo wangu wote,

usiniache niende mbali na amri zako.

¹¹Nimelificha neno lako moyoni mwangu

ili nisikutende dhambi.

¹²Uhimidiwe, Ee Mwenyezi Mungu;

nifundishe maagizo yako.

¹³Kwa midomo yangu nitasimulia sheria zote

zinazotoka katika kinywa chako.

¹⁴Ninafurahia kufuata sheria zako

kama mtu afurahiaye mali nyingi.

¹⁵Ninatafakari maagizo yako

na kuziangalia njia zako.

¹⁶Ninafurahia maagizo yako,

wala sitalipuuza neno lako.

¹⁷Mtendee mema mtumishi wako, nami nitaishi;

nitalitii neno lako.

¹⁸Yafungue macho yangu nipate kuona

mambo ya ajabu katika sheria yako.

¹⁹Mimi ni mgeni duniani,

usinifiche amri zako.

²⁰Nafsi yangu inataabika kwa shauku kubwa

kwa sheria zako wakati wote.

²¹Unawakemea wenye majivuno, waliolaaniwa,

wanaoenda mbali na amri zako.

²²Niondolee dharau na dhihaka,

kwa kuwa ninazishika sheria zako.

²³Ingawa watawala huketi pamoja na kunisingizia,

mtumishi wako atatafakari juu ya maagizo yako.

²⁴Sheria zako ni furaha yangu,

nazo ni washauri wangu.

²⁵Nimelazwa chini mavumbini,

yahifadhi maisha yangu sawasawa na neno lako.

²⁶Nilikueleza njia zangu ukanijibu,

nifundishe sheria zako.

²⁷Nijulishe mafundisho ya mausia yako,

nami nitatafakari maajabu yako.

²⁸Nafsi yangu imechakazwa kwa huzuni,

uniimarishe sawasawa na neno lako.

²⁹Niepushe na njia za udanganyifu,

kwa neema unifundishe sheria zako.

³⁰Nimechagua njia ya kweli,

nimekaza moyo wangu katika sheria zako.

³¹Nimeng’ang’ania sheria zako, Ee Mwenyezi Mungu,

usiniache niaibishwe.

³²Nakimbilia katika njia ya maagizo yako,

kwa kuwa umeuweka moyo wangu huru.

³³Ee Mwenyezi Mungu, nifundishe kuyafuata maagizo yako,

nami nitayashika hadi mwisho.

³⁴Nipe ufahamu, nami nitaishika sheria yako

na kuitii kwa moyo wangu wote.

³⁵Niongoze kwenye njia ya amri zako,

kwa kuwa huko napata furaha.

³⁶Ugeuze moyo wangu kuelekea sheria zako,

na siyo kwenye mambo ya ubinafsi.

³⁷Geuza macho yangu kutoka mambo yasiyofaa,

uyahifadhi maisha yangu sawasawa na neno lako.

³⁸Mtimizie mtumishi wako ahadi yako,

ili upate kuogopwa.

³⁹Niondolee aibu ninayoiogopa,

kwa kuwa sheria zako ni njema.

⁴⁰Tazama jinsi ninavyoonea shauku mausia yako!

Hifadhi maisha yangu katika haki yako.

⁴¹Ee Mwenyezi Mungu, upendo wako usiokoma unijie,

wokovu wako sawasawa na ahadi yako,

⁴²ndipo nitakapomjibu anayenidhihaki,

kwa kuwa ninalitumainia neno lako.

⁴³Usilinyakue neno la kweli kutoka kinywani mwangu,

kwa kuwa nimeweka tumaini langu katika amri zako.

⁴⁴Nitaitii amri yako daima,

naam, milele na milele.

⁴⁵Nitatembea huru,

kwa kuwa nimejifunza mausia yako.

⁴⁶Nitasema sheria zako mbele za wafalme

wala sitaaibishwa,

⁴⁷kwa kuwa ninazifurahia amri zako

kwa sababu ninazipenda.

⁴⁸Ninaziinulia amri zako ambazo ninazipenda mikono yangu,

nami ninatafakari juu ya maagizo yako.

⁴⁹Kumbuka neno lako kwa mtumishi wako,

kwa sababu umenipa tumaini.

⁵⁰Faraja yangu katika mateso yangu ni hii:

Ahadi yako inahifadhi maisha yangu.

⁵¹Wenye majivuno wamenisimanga bila kuchoka,

hata hivyo sitaiacha sheria yako.

⁵²Ee Mwenyezi Mungu, ninazikumbuka sheria zako za zamani,

nazo zinanifariji.

⁵³Nimeshikwa sana na ghadhabu kwa ajili ya waovu,

ambao wameacha sheria yako.

⁵⁴Maagizo yako ni kiini cha nyimbo zangu

popote ninapoishi.

⁵⁵Ee Mwenyezi Mungu, wakati wa usiku ninalikumbuka jina lako,

nami nitatii sheria yako.

⁵⁶Hili limekuwa zoezi langu:

nami ninayatii mausia yako.

⁵⁷Ee Mwenyezi Mungu, wewe ni fungu langu,

nimeahidi kuyatii maneno yako.

⁵⁸Nimetafuta uso wako kwa moyo wangu wote,

nihurumie sawasawa na ahadi yako.

⁵⁹Nimezifikiri njia zangu

na nimeelekeza hatua zangu katika mausia yako.

⁶⁰Nitafanya haraka bila kuchelewa

kuzitii amri zako.

⁶¹Hata waovu wanifunge kwa kamba,

sitasahau sheria yako.

⁶²Usiku wa manane ninaamka kukushukuru

kwa sababu ya sheria zako za haki.

⁶³Mimi ni rafiki kwa wale wote wanaokucha,

kwa wote wanaofuata mausia yako.

⁶⁴Ee Mwenyezi Mungu, dunia imejaa upendo wako,

nifundishe maagizo yako.

⁶⁵Mtendee wema mtumishi wako

Ee Mwenyezi Mungu, sawasawa na neno lako.

⁶⁶Nifundishe maarifa na uamuzi mzuri,

kwa kuwa ninaamini amri zako.

⁶⁷Kabla sijapata shida nilipotea njia,

lakini sasa ninalitii neno lako.

⁶⁸Wewe ni mwema, unalotenda ni jema,

nifundishe maagizo yako.

⁶⁹Ingawa wenye majivuno wamenisingizia uongo,

nitafuata mausia yako kwa moyo wangu wote.

⁷⁰Mioyo yao ni katili na migumu,

bali mimi napendezwa na sheria yako.

⁷¹Ilikuwa vyema mimi kupata shida

ili nipate kujifunza maagizo yako.

⁷²Sheria inayotoka kinywani mwako ina thamani kubwa kwangu

kuliko maelfu ya vipande vya fedha na dhahabu.

⁷³Mikono yako iliniumba na kunitengeneza,

nipe ufahamu niweze kujifunza amri zako.

⁷⁴Wale wanaokucha na wafurahie wanaponiona,

kwa kuwa nimeweka tumaini langu katika neno lako.

⁷⁵Ee Mwenyezi Mungu, ninajua kwamba sheria zako ni za haki,

katika uaminifu wako umeniadhibu.

⁷⁶Upendo wako usiokoma uwe faraja yangu,

sawasawa na ahadi yako kwa mtumishi wako.

⁷⁷Huruma yako na inijie ili nipate kuishi,

kwa kuwa naifurahia sheria yako.

⁷⁸Wenye majivuno na waaibishwe kwa kunikosea mimi bila sababu,

lakini mimi nitatafakari juu ya mausia yako.

⁷⁹Wale wanaokucha na wanigeukie mimi,

hao ambao wanazielewa sheria zako.

⁸⁰Moyo wangu usiwe na lawama katika kutii maagizo yako,

ili nisiaibishwe.

⁸¹Nafsi yangu inazimia kwa kutamani wokovu wako,

lakini nimeweka tumaini langu katika neno lako.

⁸²Macho yangu yamefifia, nikingoja ahadi yako;

ninasema, “Utanifariji lini?”

⁸³Ingawa nimekuwa kama kiriba kwenye moshi,

bado sijasahau maagizo yako.

⁸⁴Mtumishi wako itampasa angoje hadi lini?

Ni lini utawaadhibu washtaki wangu?

⁸⁵Wenye majivuno wananichimbia mashimo,

kinyume na sheria yako.

⁸⁶Amri zako zote ni za kuaminika;

unisaidie, kwa sababu watu wananishtaki bila sababu.

⁸⁷Walikaribia kabisa kunifuta kutoka uso wa dunia,

lakini sijaacha mausia yako.

⁸⁸Yahifadhi maisha yangu sawasawa na upendo wako,

nami nitatii sheria za kinywa chako.

⁸⁹Ee Mwenyezi Mungu, neno lako ni la milele,

linasimama imara mbinguni.

⁹⁰Uaminifu wako unaendelea kwa vizazi vyote,

umeiumba dunia, nayo inadumu.

⁹¹Sheria zako zinadumu hadi leo,

kwa kuwa vitu vyote vinakutumikia.

⁹²Kama nisingefurahia sheria yako,

ningeangamia katika taabu zangu.

⁹³Sitasahau mausia yako kamwe,

kwa maana kwayo umehifadhi maisha yangu.

⁹⁴Uniokoe, kwa maana mimi ni wako,

kwa kuwa nimetafuta mausia yako.

⁹⁵Waovu wanangojea kuniangamiza,

bali mimi ninatafakari sheria zako.

⁹⁶Katika ukamilifu wote ninaona mna kikomo,

lakini amri zako hazina mwisho.

⁹⁷Aha! Tazama, sheria yako naipenda mno ajabu.

Ninaitafakari mchana kutwa.

⁹⁸Amri zako zimenipa hekima kuliko adui zangu,

kwa kuwa nimezishika daima.

⁹⁹Nina akili kuliko walimu wangu wote,

kwa kuwa ninatafakari kuhusu sheria zako.

¹⁰⁰Nina ufahamu kuliko wazee,

kwa kuwa ninayatii mausia yako.

¹⁰¹Nimezuia miguu yangu isiende kwenye kila njia mbaya,

ili niweze kutii neno lako.

¹⁰²Sijaziacha sheria zako,

kwa kuwa umenifundisha wewe mwenyewe.

¹⁰³Tazama jinsi maneno yako yalivyo matamu kwangu,

matamu kuliko asali katika kinywa changu!

¹⁰⁴Ninapata ufahamu kutoka mausia yako,

kwa hiyo ninachukia kila njia ya upotovu.

¹⁰⁵Neno lako ni taa ya miguu yangu

na mwanga katika njia yangu.

¹⁰⁶Nimeapa na nimethibitisha,

kwamba nitafuata sheria zako za haki.

¹⁰⁷Nimeteseka sana, uhifadhi maisha yangu, Ee Mwenyezi Mungu,

sawasawa na neno lako.

¹⁰⁸Ee Mwenyezi Mungu, pokea sifa za hiari za kinywa changu,

nifundishe sheria zako.

¹⁰⁹Ingawa maisha yangu yako hatarini siku zote,

sitasahau sheria yako.

¹¹⁰Waovu wamenitegea mtego,

lakini sijayakiuka maagizo yako.

¹¹¹Sheria zako ni urithi wangu milele,

naam ni furaha ya moyo wangu.

¹¹²Nimekusudia moyoni mwangu

kuyafuata maagizo yako hadi mwisho.

¹¹³Ninachukia watu wa nia mbili,

lakini ninapenda sheria yako.

¹¹⁴Wewe ni kimbilio langu na ngao yangu,

nimeweka tumaini langu katika neno lako.

¹¹⁵Ondokeni kwangu, ninyi mtendao maovu,

ili niweze kushika amri za Mungu wangu!

¹¹⁶Nihifadhi sawasawa na ahadi yako, nami nitaishi;

usiache matumaini yangu yakavunjwa.

¹¹⁷Nitegemeze, nami nitaokolewa,

nami daima nitayaheshimu maagizo yako.

¹¹⁸Unawakataa wote wanaoyaasi maagizo yako,

kwa maana udanganyifu wao ni bure.

¹¹⁹Waovu wa nchi unawatupa kama takataka,

kwa hivyo nazipenda sheria zako.

¹²⁰Mwili wangu unatetemeka kwa kukuogopa wewe,

ninaziogopa sheria zako.

¹²¹Nimetenda yaliyo haki na sawa,

usiniache mikononi mwa watesi wangu.

¹²²Mhakikishie mtumishi wako usalama,

usiache wenye kiburi wanidhulumu.

¹²³Macho yangu yamefifia, yakitazamia wokovu wako,

na kuitazamia ahadi yako ya kweli.

¹²⁴Mtendee mtumishi wako kulingana na upendo wako

na unifundishe maagizo yako.

¹²⁵Mimi ni mtumishi wako; nipe busara

ili niweze kuelewa sheria zako.

¹²⁶Ee Mwenyezi Mungu, wakati wako wa kutenda umewadia,

kwa kuwa sheria yako inavunjwa.

¹²⁷Kwa sababu nazipenda amri zako zaidi ya dhahabu,

naam, zaidi ya dhahabu safi,

¹²⁸na kwa sababu naona maagizo yako yote ni adili,

nachukia kila njia potovu.

¹²⁹Sheria zako ni za ajabu,

hivyo ninazitii.

¹³⁰Kuingia kwa maneno yako kunaleta nuru,

kunampa mjinga ufahamu.

¹³¹Nimefungua kinywa changu na kuhema,

nikitamani amri zako.

¹³²Nigeukie na unihurumie, kama uwafanyiavyo siku zote

wale wanaolipenda jina lako.

¹³³Ongoza hatua zangu kulingana na neno lako,

usiache dhambi yoyote initawale.

¹³⁴Niokoe na uonevu wa wanadamu,

ili niweze kutii mausia yako.

¹³⁵Mwangazie mtumishi wako uso wako

na unifundishe amri zako.

¹³⁶Chemchemi za machozi zinatiririka machoni yangu,

kwa kuwa sheria yako haifuatwi.

¹³⁷Ee Mwenyezi Mungu, wewe ni mwenye haki,

sheria zako ni sahihi.

¹³⁸Sheria ulizoziweka ni za haki,

ni za kuaminika kikamilifu.

¹³⁹Jitihada yangu imenidhoofisha, kwa kuwa adui zangu

wanayapuuza maneno yako.

¹⁴⁰Ahadi zako zimejaribiwa kikamilifu,

mtumishi wako anazipenda.

¹⁴¹Ingawa ni mdogo na ninadharauliwa,

sisahau mausia yako.

¹⁴²Haki yako ni ya milele,

na sheria yako ni kweli.

¹⁴³Shida na dhiki zimenipata,

lakini amri zako ni furaha yangu.

¹⁴⁴Sheria zako ni sahihi milele,

hunipa ufahamu ili nipate kuishi.

¹⁴⁵Ee Mwenyezi Mungu, ninakuita kwa moyo wangu wote,

nami nitayatii maagizo yako.

¹⁴⁶Ninakuita; niokoe

nami nitazishika sheria zako.

¹⁴⁷Ninaamka asubuhi na mapema na kukuomba msaada;

nimeweka tumaini langu katika neno lako.

¹⁴⁸Sikufumba macho yangu usiku kucha,

ili niweze kutafakari juu ya ahadi zako.

¹⁴⁹Usikie sauti yangu sawasawa na upendo wako,

Ee Mwenyezi Mungu,

uyahifadhi maisha yangu,

sawasawa na sheria zako.

¹⁵⁰Wale wanaopanga mipango miovu wako karibu nami,

lakini wako mbali na sheria yako.

¹⁵¹Ee Mwenyezi Mungu, hata hivyo wewe u karibu,

na amri zako zote ni za kweli.

¹⁵²Tangu zamani nimejifunza kutoka shuhuda zako

kwamba umezithibitisha ili zidumu milele.

¹⁵³Yaangalie mateso yangu, uniokoe,

kwa kuwa sijasahau sheria yako.

¹⁵⁴Nitetee katika hali hii yangu na unikomboe,

uyahifadhi maisha yangu sawasawa na ahadi yako.

¹⁵⁵Wokovu uko mbali na waovu,

kwa kuwa hawatafuti maagizo yako.

¹⁵⁶Ee Mwenyezi Mungu, huruma zako ni kuu,

uyahifadhi maisha yangu sawasawa na sheria zako.

¹⁵⁷Adui wanaonitesa ni wengi,

lakini mimi sitaziacha sheria zako.

¹⁵⁸Ninawatazama wasioamini kwa chuki,

kwa kuwa hawalitii neno lako.

¹⁵⁹Tazama jinsi ninavyopenda mausia yako;

Ee Mwenyezi Mungu, uyahifadhi maisha yangu,

sawasawa na upendo wako.

¹⁶⁰Maneno yako yote ni kweli,

sheria zako zote za haki ni za milele.

¹⁶¹Watawala wamenitesa bila sababu,

lakini moyo wangu unatetemeka kwa neno lako.

¹⁶²Nafurahia ahadi zako

kama mtu aliyepata mateka mengi.

¹⁶³Ninachukia na kuchukizwa sana na uongo,

lakini napenda sheria yako.

¹⁶⁴Ninakusifu mara saba kwa siku,

kwa ajili ya sheria zako za haki.

¹⁶⁵Wanaopenda sheria yako wana amani tele,

wala hakuna kitu kinachoweza kuwakwaza.

¹⁶⁶Ee Mwenyezi Mungu, ninangojea wokovu wako,

nami ninafuata amri zako,

¹⁶⁷Ninazitii sheria zako,

kwa sababu ninazipenda mno.

¹⁶⁸Nimetii mausia yako na sheria zako,

kwa kuwa njia zangu zote zinajulikana kwako.

¹⁶⁹Ee Mwenyezi Mungu, kilio changu na kifike mbele zako,

nipe ufahamu sawasawa na neno lako.

¹⁷⁰Maombi yangu na yafike mbele zako,

niokoe sawasawa na ahadi yako.

¹⁷¹Midomo yangu na ibubujike sifa,

kwa kuwa unanifundisha maagizo yako.

¹⁷²Ulimi wangu na uimbe kuhusu neno lako,

kwa kuwa amri zako zote ni za haki.

¹⁷³Mkono wako uwe tayari kunisaidia,

kwa kuwa nimechagua mausia yako.

¹⁷⁴Ee Mwenyezi Mungu, ninatamani wokovu wako,

na sheria yako ni furaha yangu.

¹⁷⁵Nijalie kuishi ili nipate kukusifu,

na sheria zako zinitegemeze.

¹⁷⁶Nimetangatanga kama kondoo aliyepotea.

Mtafute mtumishi wako,

kwa kuwa sijasahau amri zako.