Zaburi 12

Kuomba msaada

¹Bwana tusaidie, kwa kuwa wacha Mungu wametoweka;

waaminifu wametoweka miongoni mwa wanadamu.

²Kila mmoja humwambia jirani yake uongo;

midomo yao ya hila huzungumza kwa udanganyifu.

³Bwana na akatilie mbali midomo yote ya hila

na kila ulimi uliojaa majivuno,

⁴ule unaosema, “Kwa ndimi zetu tutashinda;

midomo ni mali yetu, bwana wetu ni nani?”

⁵“Kwa sababu wanyonge wanaonewa,

na wahitaji wanalia kwa uchungu,

nitainuka sasa,” asema Bwana .

“Nitawalinda kutokana na wale

wenye nia mbaya juu yao.”

⁶Maneno ya Bwana ni safi,

kama fedha iliyosafishwa katika tanuru,

iliyosafishwa mara saba.

⁷Ee Bwana , utatuweka salama

na kutulinda na kizazi hiki milele.

⁸Watu waovu huenda wakiringa kila mahali

wakati yule aliye mbaya sana

ndiye anayeheshimiwa miongoni mwa watu.