Zaburi 120

Kuomba msaada dhidi ya wadanganyifu

¹Katika dhiki yangu namwita Mwenyezi Mungu,

naye hunijibu.

²Ee Mwenyezi Mungu, uniokoe kutoka midomo ya uongo

na ndimi za udanganyifu.

³Atakufanyia nini,

au akufanyie nini zaidi, ewe ulimi mdanganyifu?

⁴Atakuadhibu kwa mishale mikali ya shujaa,

kwa makaa yanayowaka ya mti wa mretemu.

⁵Ole wangu kwa kuwa naishi Mesheki,

kwamba naishi katikati ya mahema ya Kedari!

⁶Nimeishi muda mrefu mno

miongoni mwa wale wanaochukia amani.

⁷Mimi ni mtu wa amani;

lakini ninaposema, wao wanataka vita.