Zaburi 142

Maombi ya kuokolewa dhidi ya watesi

¹Namlilia Mwenyezi Mungu kwa sauti,

napaza sauti yangu kwa Mwenyezi Mungu anihurumie.

²Namimina malalamiko yangu mbele zake,

mbele zake naeleza shida zangu.

³Roho yangu inapozimia ndani yangu,

wewe ndiwe unajua njia zangu.

Katika njia ninayopita,

watu wameniwekea mtego.

⁴Tazama kuume kwangu na uone,

hakuna hata mmoja anayejihusisha nami.

Sina kimbilio,

hakuna anayejali maisha yangu.

⁵Ee Mwenyezi Mungu, nakulilia wewe,

nasema, “Wewe ni kimbilio langu,

fungu langu katika nchi ya walio hai.”

⁶Sikiliza kilio changu,

kwa sababu mimi ni mhitaji sana;

niokoe na wale wanaonifuatilia,

kwa kuwa wamenizidi nguvu.

⁷Nifungue kutoka kifungo changu,

ili niweze kulisifu jina lako.

Ndipo wenye haki watanizunguka,

kwa sababu ya wema wako kwangu.