Zaburi 20

Maombi kwa ajili ya ushindi

¹Bwana na akujibu unapokuwa katika dhiki,

jina la Mungu wa Yakobo na liwe kinga yako.

²Na akutumie msaada kutoka patakatifu

na akupatie msaada kutoka Sayuni.

³Na azikumbuke dhabihu zako zote,

na azikubali sadaka zako za kuteketezwa.

⁴Na akujalie haja ya moyo wako,

na aifanikishe mipango yako yote.

⁵Tutashangilia kwa furaha utakaposhinda,

tutainua bendera zetu kwa jina la Mungu wetu.

Bwana na akupe haja zako zote.

⁶Sasa nafahamu kuwa Bwana

humwokoa mpakwa mafuta wake,

humjibu kutoka mbingu yake takatifu

kwa nguvu za wokovu wa mkono wake wa kuume.

⁷Wengine wanatumaini magari ya vita, na wengine farasi,

bali sisi tutalitumainia jina la Bwana , Mungu wetu.

⁸Wao wameshushwa chini na kuanguka,

bali sisi tunainuka na kusimama imara.

⁹Ee Bwana , mwokoe mfalme!

Tujibu tunapokuita!