Zaburi 35

Kuomba msaada: Kuokolewa kutokana na adui

¹Ee Bwana , pingana na wale wanaopingana nami,

upigane na hao wanaopigana nami.

²Chukua ngao na kigao.

Inuka unisaidie.

³Inua mkuki wako na fumo lako[#35:3 Fumo ni sawa na sagai, yaani mkuki mfupi.]

dhidi ya hao wanaonifuatia.

Iambie nafsi yangu,

“Mimi ni wokovu wako.”

⁴Wafedheheshwe na waaibishwe

wale wanaotafuta uhai wangu.

Wanaofanya shauri kuniangamiza

wafukuzwe mbali kwa bumbuazi.

⁵Wawe kama makapi yapeperushwayo na upepo,

malaika wa Bwana akiwafukuza.

⁶Njia yao na iwe giza na ya utelezi,

malaika wa Bwana akiwafuatilia.

⁷Kwa vile walinifichia wavu wao bila sababu,

na bila sababu wamenichimbia shimo,

⁸maafa na yawapate ghafula:

wavu walionifichia na uwatege wenyewe,

na waanguke katika shimo hilo,

kwa maangamizi yao.

⁹Ndipo nafsi yangu itashangilia katika Bwana

na kuufurahia wokovu wake.

¹⁰Nitapaza sauti yangu nikisema,

“Ni nani aliye kama wewe, Ee Bwana ?

Wewe huwaokoa maskini kutokana na wale waliowazidi nguvu,

unawaokoa maskini na wahitaji kutokana na wanaowanyangʼanya!”

¹¹Mashahidi wakatili wanainuka,

wananiuliza mambo nisiyoyajua.

¹²Wananilipa baya kwa jema

na kuiacha nafsi yangu ukiwa.

¹³Lakini walipokuwa wagonjwa, nilivaa gunia

na nikajinyenyekeza kwa kufunga.

Maombi yangu yaliponirudia bila kujibiwa,

¹⁴niliendelea kuomboleza

kama vile wao ni rafiki au ndugu.

Niliinamisha kichwa chini kwa huzuni

kama ninayemwombolezea mama yangu.

¹⁵Lakini nilipojikwaa,

walikusanyika kwa shangwe;

washambuliaji walijikusanya dhidi yangu

bila mimi kujua.

Walinisingizia pasipo kukoma.

¹⁶Kama watu wasiomcha Mungu, wamenidhihaki,

wamenisagia meno.

¹⁷Ee Bwana, utatazama hadi lini?

Niokoe maisha yangu na maangamizi yao,

okoa uhai wangu wa thamani

kutokana na simba hawa.

¹⁸Nami nitakushukuru mbele ya kusanyiko kubwa,

nitakusifu katikati ya watu wengi.

¹⁹Usiwaache wale wanaonisimanga,

wale ambao ni adui zangu bila sababu;

usiwaache wale ambao ni adui zangu bila sababu

wakonyeze jicho kwa hila.

²⁰Hawazungumzi kwa amani,

bali wanatunga mashtaka ya uongo

dhidi ya wale wanaoishi

kwa utulivu katika nchi.

²¹Hunifumbulia vinywa vyao wakisema, “Aha! Aha!

Kwa macho yetu wenyewe tumeliona.”

²²Ee Bwana , umeona hili, usiwe kimya.

Usiwe mbali nami, Ee Bwana.

²³Amka, inuka unitetee!

Unipiganie Mungu wangu na Bwana wangu.

²⁴Nihukumu kwa haki yako, Ee Bwana Mungu wangu,

sawasawa na haki yako;

usiwaache wakusimange.

²⁵Usiwaache wafikiri, “Aha, hili ndilo tulilotaka!”

Au waseme, “Tumemmeza.”

²⁶Wote wanaofurahia dhiki yangu

waaibishwe na wachanganyikiwe;

hao wanaojiinua dhidi yangu

wavikwe aibu na dharau.

²⁷Wale wanaofurahia hukumu yangu ya haki

wapige kelele za shangwe na furaha;

hebu waseme siku zote, “Bwana atukuzwe,

ambaye amefurahia mafanikio ya mtumishi wake.”

²⁸Ulimi wangu utanena haki yako

na sifa zako mchana kutwa.