Zaburi 41

Maombi ya mtu mgonjwa

¹Heri mtu yule anayemjali mnyonge,

Bwana atamwokoa wakati wa shida.

²Bwana atamlinda na kuyahifadhi maisha yake,

atambariki katika nchi

na hatamwacha katika tamaa ya adui zake.

³Bwana atamtegemeza akiwa mgonjwa kitandani,

na atamwinua kutoka kitandani mwake.

⁴Nilisema, “Ee Bwana nihurumie,

niponye, maana nimekutenda dhambi wewe.”

⁵Adui zangu wanasema kwa hila,

“Lini atakufa, na jina lake litokomee kabisa.”

⁶Kila anapokuja mtu kunitazama,

huzungumza uongo,

huku moyo wake ukikusanya masingizio;

kisha huondoka na kuyasambaza.

⁷Adui zangu wote hunongʼonezana dhidi yangu,

hao huniwazia mabaya sana, wakisema,

⁸“Ugonjwa mbaya sana umempata,

kamwe hatainuka tena kitandani mwake.”

⁹Hata rafiki yangu wa karibu niliyemwamini,

yule aliyekula chakula changu

ameniinulia kisigino chake.

¹⁰Lakini wewe, Ee Bwana , nihurumie,

ukaniinue tena, ili niweze kuwalipiza kisasi.

¹¹Najua kwamba wapendezwa nami,

kwa kuwa adui yangu hanishindi.

¹²Katika uadilifu wangu unanitegemeza

na kuniweka kwenye uwepo wako milele.

¹³Mtukuzeni Bwana , Mungu wa Israeli,

tangu milele na hata milele.