Zaburi 49

Upumbavu wa kutegemea mali

¹Sikieni haya, enyi mataifa yote,

sikilizeni, ninyi wote mnaoishi dunia hii.

²Wakubwa kwa wadogo,

matajiri na maskini pamoja:

³Kinywa changu kitasema maneno ya hekima,

usemi wa moyo wangu utatoa ufahamu.

⁴Nitatega sikio langu nisikilize mithali,

nitafafanua kitendawili kwa zeze:

⁵Kwa nini niogope siku mbaya zinapokuja,

wakati wadanganyifu waovu wanaponizunguka,

⁶wale wanaotegemea mali yao

na kujivunia utajiri wao mwingi?

⁷Hakuna mwanadamu yeyote

awezaye kuukomboa uhai wa mwingine,

au kumpa Mungu fidia kwa ajili yake.

⁸Fidia ya uhai ni gharama kubwa,

hakuna malipo yoyote yanayotosha,

⁹ili aishi milele

na asione uharibifu.

¹⁰Wote wanaona kwamba watu wenye hekima hufa;

wajinga na wapumbavu vivyo hivyo huangamia

na kuwaachia wengine mali yao.

¹¹Makaburi yao yatabaki kuwa nyumba zao za milele,

makao yao vizazi vyote;

ingawa walikuwa na mashamba

na kuyaita kwa majina yao.

¹²Lakini mwanadamu, licha ya utajiri wake, hadumu;

anafanana na mnyama aangamiaye.

¹³Hii ndiyo hatima ya wale wanaojitumainia wenyewe,

pia ya wafuasi wao, waliothibitisha misemo yao.

¹⁴Kama kondoo, wamewekewa kwenda kaburini,[#49:14 Kaburini hapa ina maana ya Sheol kwa Kiebrania, yaani Kuzimu.]

nacho kifo kitawala.

Wanyofu watawatawala asubuhi,

maumbile yao yataozea kaburini,

mbali na majumba yao makubwa ya fahari.

¹⁵Lakini Mungu atakomboa uhai wangu dhidi ya kaburi;[#49:15 au nafsi]

hakika atanichukua kwake.

¹⁶Usitishwe mtu anapotajirika,

fahari ya nyumba yake inapoongezeka,

¹⁷kwa maana hatachukua chochote atakapokufa,

fahari yake haitashuka pamoja naye.

¹⁸Ingawa alipokuwa akiishi alijihesabu kuwa heri,

na wanadamu wanakusifu unapofanikiwa,

¹⁹atajiunga na kizazi cha baba zake,

ambao hawataona kamwe nuru ya uzima.

²⁰Wanadamu wenye utajiri bila ufahamu

ni kama wanyama wanaoangamia.