Zaburi 54

Kuomba ulinzi wa Mungu kutokana na adui

¹Ee Mungu uniokoe kwa jina lako,

unifanyie hukumu kwa uwezo wako.

²Ee Mungu, sikia maombi yangu,

usikilize maneno ya kinywa changu.

³Wageni wananishambulia,

watu wakatili wanayatafuta maisha yangu,

watu wasiomjali Mungu.

⁴Hakika Mungu ni msaada wangu,

Bwana ndiye anayenitegemeza.

⁵Mabaya na yawarudie wale wanaonisingizia,

kwa uaminifu wako uwaangamize.

⁶Nitakutolea dhabihu za hiari;

Ee Bwana , nitalisifu jina lako

kwa kuwa ni vyema.

⁷Kwa maana ameniokoa katika shida zangu zote,

na macho yangu yamewatazama adui zangu kwa ushindi.