Zaburi 55

Maombi ya mtu aliyesalitiwa na rafiki

¹Ee Mungu, sikiliza maombi yangu,

wala usidharau hoja yangu.

²Nisikie na unijibu.

Mawazo yangu yananisumbua na nimehangaishwa

³kwa sauti ya adui,

kwa kukaziwa macho na waovu,

kwa sababu wananiletea mateso juu yangu

na kunitukana kwa hasira zao.

⁴Moyo wangu umejaa uchungu,

hofu za mauti zimenishambulia.

⁵Woga na kutetemeka vimenizunguka,

hofu kuu imenigharikisha.

⁶Nilisema, “Laiti ningekuwa na mabawa ya njiwa!

Ningeruka niende mbali kupumzika.

⁷Ningetorokea mbali sana

na kukaa jangwani,

⁸ningeharakisha kwenda mahali pa salama,

mbali na tufani kali na dhoruba.”

⁹Ee Bwana, uwatahayarishe waovu

na uwachanganyishie semi zao,

maana nimeona jeuri na ugomvi mjini.

¹⁰Usiku na mchana wanazunguka juu ya kuta zake,

uovu na dhuluma vimo ndani yake.

¹¹Nguvu za uharibifu zinatenda kazi mjini,

vitisho na uongo haviondoki mitaani mwake.

¹²Kama aliyenitukana ni adui yangu, ningevumilia,

kama mtu mwovu angejiinua dhidi yangu,

ningejificha asinione.

¹³Kumbe ni wewe, mwenzangu,

mshiriki na rafiki yangu wa karibu,

¹⁴ambaye awali tulifurahia ushirika mzuri,

tulipokuwa tukienda na umati hekaluni mwa Mungu.

¹⁵Kifo na kiwajie adui zangu ghafula,

na washuke Kuzimu wangali hai,

kwa maana uovu uko ndani yao.

¹⁶Lakini ninamwita Mungu,

naye Bwana huniokoa.

¹⁷Jioni, asubuhi na adhuhuri

ninalia kwa huzuni,

naye husikia sauti yangu.

¹⁸Huniokoa nikawa salama katika vita

vilivyopangwa dhidi yangu,

ingawa watu wengi hunipinga.

¹⁹Mungu anayemiliki milele,

atawasikia na kuwaadhibu,

watu ambao hawabadilishi njia zao,

wala hawana hofu ya Mungu.

²⁰Mwenzangu hushambulia rafiki zake,

naye huvunja agano lake.

²¹Mazungumzo yake ni laini kama siagi,

hata hivyo vita vimo moyoni mwake.

Maneno yake ni mororo kuliko mafuta,

hata hivyo ni upanga mkali uliofutwa.

²²Mtwike Bwana fadhaa zako,

naye atakutegemeza,

hatamwacha kamwe mwenye haki wake aanguke.

²³Lakini wewe, Ee Mungu,

utawashusha waovu katika shimo la uharibifu.

Wenye kiu ya kumwaga damu na wenye hila,

hawataishi nusu ya siku zao.

Lakini mimi ninakutumaini wewe.