Zaburi 57

Kuomba msaada

¹Unihurumie, Ee Mungu, unihurumie,

kwa maana nafsi yangu inakukimbilia.

Chini ya uvuli wa mabawa yako nitakimbilia

hadi maafa yapite.

²Namlilia Mungu Aliye Juu Sana,

Mungu anayetimiza makusudi yake kwangu.

³Hutumana msaada kutoka mbinguni na kuniokoa,

akiwakemea wale wanaonifuatilia vikali;

Mungu huutuma upendo wake na uaminifu wake.

⁴Niko katikati ya simba;

nimelala katikati ya wanyama wenye njaa kali,

watu ambao meno yao ni mikuki na mishale,

ambao ndimi zao ni panga kali.

⁵Ee Mungu, utukuzwe juu ya mbingu,

utukufu wako na uenee duniani kote.

⁶Waliitegea miguu yangu nyavu,

nikachoshwa na dhiki.

Wamechimba shimo katika njia yangu,

lakini wametumbukia humo wao wenyewe.

⁷Ee Mungu, moyo wangu ni thabiti,

moyo wangu ni thabiti;

nitaimba na kusifu kwa nyimbo.

⁸Amka, nafsi yangu!

Amka, kinubi na zeze!

Nitayaamsha mapambazuko.

⁹Nitakusifu wewe, Ee Bwana, kati ya mataifa;

nitaimba habari zako, kati ya jamaa za watu.

¹⁰Kwa maana upendo wako ni mkuu, waenea hadi mbinguni,

uaminifu wako unazifikia anga.

¹¹Ee Mungu, utukuzwe juu mbinguni,

utukufu wako na uwe duniani pote.