Zaburi 58

Mungu kuwaadhibu waovu

¹Enyi watawala, je, kweli mwanena kwa haki?

Je, mnahukumu kwa unyofu miongoni mwa watu?

²La, mioyoni mwenu mnatunga udhalimu,

na mikono yenu hueneza jeuri duniani.

³Waovu ni wapotovu tangu kuzaliwa kwao,

toka tumboni mwa mama zao

ni wakaidi na husema uongo.

⁴Sumu yao ni kama sumu ya nyoka,

kama ile ya fira ambaye ameziba masikio yake,

⁵ambaye hatasikia sauti ya kutumbuiza ya mwaguzi,

hata kama mganga angecheza kwa ustadi kiasi gani.

⁶Ee Mungu, yavunje meno katika vinywa vyao;

Ee Bwana , vunja meno makali ya hao simba!

⁷Na watoweke kama maji yanavyotiririka;

wanapovuta pinde zao, mishale yao na iwe butu.

⁸Na wawe kama konokono anayeyeyuka akitembea,

kama mtoto aliyezaliwa akiwa mfu.

⁹Kabla vyungu vyenu havijapata moto wa kuni za miiba,

zikiwa mbichi au kavu,

waovu watakuwa

wamefagiliwa mbali.

¹⁰Wenye haki watafurahi wakilipizwa kisasi,

watakapochovya nyayo zao katika damu ya waovu.

¹¹Ndipo wanadamu watasema,

“Hakika utulivu wa wenye haki bado una thawabu,

hakika kuna Mungu ahukumuye dunia.”