Zaburi 65

Kusifu na kushukuru

¹Ee Mungu, sifa zakungojea katika Sayuni;

kwako wewe nadhiri zetu zitatimizwa.

²Ewe usikiaye maombi,

watu wote watakuja kwako wewe.

³Tulipokuwa tumefunikwa kabisa na dhambi,

wewe ulisamehe makosa yetu.

⁴Heri wale uliowachagua

na kuwaleta karibu ili waishi katika nyua zako!

Tunashibishwa kwa mema ya nyumba yako,

mema ya Hekalu lako takatifu.

⁵Unatujibu kwa matendo ya kushangaza ya haki,

Ee Mungu Mwokozi wetu,

tumaini la miisho yote ya duniani

na la bahari zilizo mbali sana,

⁶uliyeumba milima kwa uwezo wako,

ukiwa umejivika nguvu,

⁷uliyenyamazisha dhoruba za bahari,

ngurumo za mawimbi yake,

na ghasia za mataifa.

⁸Wale wanaoishi mbali sana

wanaogopa maajabu yako,

kule asubuhi ipambazukiapo

na kule jioni inakofifilia

umeziita nyimbo za furaha.

⁹Waitunza nchi na kuinyeshea,

waitajirisha kwa wingi.

Vijito vya Mungu vimejaa maji

ili kuwapa watu nafaka,

kwa maana wewe umeviamuru.

¹⁰Umeilowesha mifereji yake

na kusawazisha kingo zake;

umeilainisha kwa manyunyu

na kuibariki mimea yake.

¹¹Umeuvika mwaka taji la baraka,

magari yako yanafurika kwa wingi.

¹²Mbuga za majani za jangwani umezineemesha;

vilima vimevikwa furaha.

¹³Malisho yamejaa makundi ya wanyama,

na mabonde yamepambwa kwa mavuno;

vyote vinashangilia kwa furaha na kuimba.