Zaburi 71

Kuomba ulinzi na msaada maishani

¹Ee Bwana , nimekukimbilia wewe,

usiache nikaaibika kamwe.

²Kwa haki yako uniponye na kuniokoa,

unitegee sikio lako uniokoe.

³Uwe kwangu mwamba wa kimbilio,

mahali nitakapokimbilia kila wakati;

toa amri ya kuniokoa, kwa kuwa wewe

ni mwamba wangu na ngome yangu.

⁴Ee Mungu wangu uniokoe kutoka mkono wa mwovu,

kutoka makucha ya watu wapotovu na wakatili.

⁵Kwa kuwa umekuwa tumaini langu, Ee Bwana Mwenyezi,

tegemeo langu tangu ujana wangu.

⁶Tangu kuzaliwa nimekutegemea wewe,

ulinitoa tumboni mwa mama yangu.

Nitakusifu wewe daima.

⁷Nimekuwa ishara mbaya kwa wengi,

lakini wewe ni kimbilio langu imara.

⁸Kinywa changu kimejazwa sifa zako,

nikitangaza utukufu wako mchana kutwa.

⁹Usinitupe wakati wa uzee,

wala usiniache nguvu zangu zinapopungua.

¹⁰Kwa maana adui zangu wananisengenya,

wale wanaotaka kuniua wanapanga njama.

¹¹Wanasema, “Mungu amemwacha,

mkimbilieni mkamkamate,

kwani hakuna wa kumwokoa.”

¹²Ee Mungu, usiwe mbali nami,

njoo haraka kunisaidia, Ee Mungu wangu.

¹³Washtaki wangu na waangamie kwa aibu,

wale wanaotaka kunidhuru

na wafunikwe kwa dharau na fedheha.

¹⁴Lakini mimi nitatumaini siku zote;

nitakusifu zaidi na zaidi.

¹⁵Kinywa changu kitasimulia haki yako,

wokovu wako mchana kutwa,

ingawa sifahamu kipimo chake.

¹⁶Ee Bwana Mwenyezi, nitakuja

na kutangaza matendo yako makuu,

nitatangaza haki yako, yako peke yako.

¹⁷Ee Mungu, umenifundisha tangu ujana wangu,

hadi leo ninatangaza matendo yako ya ajabu.

¹⁸Ee Mungu, usiniache,

hata nikiwa mzee wa mvi,

hadi nitangaze uwezo wako kwa kizazi kijacho,

nguvu zako kwa wote watakaokuja baadaye.

¹⁹Ee Mungu, haki yako imefika juu Lakini mimi mbingu,

wewe ambaye umefanya mambo makuu.

Ee Mungu, ni nani aliye kama wewe?

²⁰Ingawa umenifanya nipate taabu nyingi na chungu,

utanihuisha tena,

kutoka vilindi vya dunia

utaniinua tena.

²¹Utaongeza heshima yangu

na kunifariji tena.

²²Ee Mungu wangu, nitakusifu kwa kinubi

kwa ajili ya uaminifu wako;

Ee Uliye Mtakatifu wa Israeli,

nitakuimbia sifa kwa zeze.

²³Midomo yangu itapaza sauti kwa furaha

ninapokuimbia sifa,

mimi, ambaye umenikomboa.

²⁴Ulimi wangu utasimulia matendo yako ya haki

mchana kutwa,

kwa maana wale waliotaka kunidhuru,

wameaibishwa na kufadhaishwa.