Zaburi 74

Maombi kwa ajili ya taifa

¹Ee Mungu, mbona umetukataa milele?

Mbona hasira yako inatoka moshi

juu ya kondoo wa malisho yako?

²Kumbuka watu uliowanunua zamani,

kabila la urithi wako, ambao uliwakomboa:

Mlima Sayuni, ambamo uliishi.

³Geuza hatua zako kuelekea magofu haya ya kudumu,

uharibifu wote huu ambao adui ameuleta pale patakatifu.

⁴Adui zako wamenguruma pale ulipokutana nasi,

wanaweka bendera zao kama alama.

⁵Walifanya kama watu wanaotumia mashoka

kukata kichaka cha miti.

⁶Walivunjavunja milango yote iliyonakshiwa

kwa mashoka na vishoka vyao.

⁷Waliteketeza kabisa mahali pako patakatifu,

wakayanajisi makao ya Jina lako.

⁸Walisema mioyoni mwao,

“Tutawaponda kabisa!”

Walichoma kila mahali Mungu

alipoabudiwa katika nchi.

⁹Hatukupewa ishara za miujiza;

hakuna manabii waliobaki,

hakuna yeyote kati yetu ajuaye

hali hii itachukua muda gani.

¹⁰Ee Mungu, mtesi atakudhihaki hadi lini?

Je, adui watalitukana jina lako milele?

¹¹Kwa nini unazuia mkono wako,

mkono wako wa kuume?

Uutoe kutoka makunjo ya vazi lako

na uwaangamize!

¹²Lakini wewe, Ee Mungu, ni mfalme wangu tangu zamani,

unaleta wokovu duniani.

¹³Ni wewe uliyeigawanya bahari kwa uweza wako;

ulivunja vichwa vya mnyama mkubwa wa baharini.

¹⁴Ni wewe uliyeponda vichwa vya Lewiathani,[#74:14 Lewiathani ni mnyama mkubwa wa baharini mwenye magamba anayefanana na joka kubwa, mwenye umbo la kutisha, asiyeweza kuvuliwa.]

nawe ukamtoa kama chakula kwa viumbe vya jangwani.

¹⁵Ni wewe uliyefungua chemchemi na vijito,

ulikausha mito iliyokuwa ikitiririka daima.

¹⁶Mchana ni wako, na usiku ni wako pia;

uliziweka jua na mwezi.

¹⁷Ni wewe uliyeiweka mipaka yote ya dunia,

ulifanya kiangazi na masika.

¹⁸Ee Bwana , kumbuka jinsi mtesi alivyokudhihaki,

jinsi watu wapumbavu walivyolitukana jina lako.

¹⁹Usiukabidhi uhai wa njiwa wako kwa wanyama mwitu;

usisahau kabisa uhai wa watu wako wanaoteseka milele.

²⁰Likumbuke agano lako,

maana mara kwa mara mambo ya jeuri

yamejaa katika sehemu za giza nchini.

²¹Usiruhusu waliodhulumiwa warudi nyuma kwa aibu;

maskini na wahitaji hebu walisifu jina lako.

²²Inuka, Ee Mungu, ujitetee;

kumbuka jinsi wapumbavu

wanavyokudhihaki mchana kutwa.

²³Usipuuze makelele ya watesi wako,

ghasia za adui zako, zinazoinuka mfululizo.