Zaburi 76

Mungu wa Israeli ni mhukumu wa dunia yote

¹Katika Yuda, Mungu anajulikana,

jina lake ni kuu katika Israeli.

²Hema lake liko Salemu,

makao yake katika Sayuni.

³Huko alivunja mishale iliyowaka,

ngao na panga, silaha za vita.

⁴Wewe unangʼaa kwa mwanga,

mwenye fahari zaidi ya milima yenye utajiri wa wanyama pori.

⁵Mashujaa hulala wametekwa nyara,

hulala usingizi wao wa mwisho;

hakuna hata mmoja wa watu wa vita

anayeweza kuinua mikono yake.

⁶Kwa kukemea kwako, Ee Mungu wa Yakobo,

farasi na gari la vita vilikaa kimya.

⁷Wewe peke yako ndiye wa kuogopwa.

Ni nani awezaye kusimama mbele yako unapokasirika?

⁸Ulitamka hukumu kutoka mbinguni,

nayo nchi ikaogopa, ikawa kimya:

⁹wakati wewe, Ee Mungu, ulipoinuka kuhukumu,

kuwaokoa wote walioonewa katika nchi.

¹⁰Hakika ghadhabu yako dhidi ya wanadamu inakuletea sifa,

na masalia ya ghadhabu yako unajifunga mshipi.

¹¹Wekeni nadhiri kwa Bwana Mungu wenu na kuzitimiza;

nchi zote za jirani na walete zawadi

kwa Yule astahiliye kuogopwa.

¹²Huvunja roho za watawala;

anaogopwa na wafalme wa dunia.