Zaburi 77

Matendo makuu ya Mungu yanakumbukwa

¹Nilimlilia Mungu ili anisaidie,

nilimlilia Mungu ili anisikie.

²Nilipokuwa katika taabu, nilimtafuta Bwana,

usiku nilinyoosha mikono bila kuchoka

na nafsi yangu ilikataa kufarijika.

³Ee Mungu, nilikukumbuka wewe, nikalia kwa huzuni;

nikatafakari, roho yangu ikadhoofika.

⁴Ulizuia macho yangu kufumba;

nilikuwa nasumbuka, nikashindwa kusema.

⁵Nilitafakari kuhusu siku zilizopita,

miaka mingi iliyopita,

⁶nilikumbuka nilivyoimba nyimbo usiku.

Moyo wangu ulitafakari

na roho yangu ikauliza:

⁷“Je, Bwana atakataa milele?

Je, hatatenda mema tena?

⁸Je, upendo wake usio na mwisho umetoweka milele?

Je, ahadi yake imekoma nyakati zote?

⁹Je, Mungu amesahau kuwa na huruma?

Je, katika hasira amezuia fadhili zake?”

¹⁰Ndipo nikawaza, “Huu ndio udhaifu wangu:

lakini nitakumbuka

miaka ya mkono wa kuume

wa Aliye Juu Sana.”

¹¹Nitayakumbuka matendo ya Bwana ;

naam, nitaikumbuka miujiza yako ya zamani.

¹²Nitazitafakari kazi zako zote

na kuyawaza matendo yako makuu.

¹³Ee Mungu, njia zako ni takatifu.

Ni mungu yupi aliye mkuu kama Mungu wetu?

¹⁴Wewe ndiwe Mungu utendaye miujiza,

umeonesha uwezo wako kati ya mataifa.

¹⁵Kwa mkono wako wenye nguvu umewakomboa watu wako,

uzao wa Yakobo na Yusufu.

¹⁶Maji yalikuona, Ee Mungu,

maji yalikuona yakakimbia,

vilindi vilitetemeka.

¹⁷Mawingu yalimwaga maji,

mbingu zikatoa ngurumo kwa radi;

mishale yako ilimetameta huku na huko.

¹⁸Ngurumo yako ilisikika katika upepo wa kisulisuli,

umeme wako wa radi ukaangaza dunia,

nchi ikatetemeka na kutikisika.

¹⁹Njia yako ilipita baharini,

mapito yako kwenye maji makuu,

ingawa nyayo zako hazikuonekana.

²⁰Uliongoza watu wako kama kundi

kwa mkono wa Musa na Haruni.