Zaburi 84

Kuionea shauku nyumba ya Mungu

¹Ee Bwana wa majeshi,

makao yako yapendeza kama nini!

²Nafsi yangu inatamani sana,

naam, hata kuona shauku,

kwa ajili ya nyua za Bwana ;

moyo wangu na mwili wangu

vinamlilia Mungu Aliye Hai.

³Hata shomoro amejipatia makao,

mbayuwayu amejipatia kiota

mahali awezapo kuweka makinda yake:

mahali karibu na madhabahu yako,

Ee Bwana wa majeshi,

Mfalme wangu na Mungu wangu.

⁴Heri wale wanaokaa nyumbani mwako,

wanaokusifu wewe daima.

⁵Heri wale ambao nguvu zao ziko kwako,

na njia ziendazo Sayuni zimo mioyoni mwao.

⁶Wanapopita katika Bonde la Baka,[#84:6 maana yake Bonde la Vilio]

hulifanya mahali pa chemchemi,

pia mvua za vuli hulijaza kwa madimbwi.

⁷Huendelea toka nguvu hadi nguvu,

hadi kila mmoja afikapo

mbele za Mungu huko Sayuni.

⁸Ee Bwana Mungu wa majeshi, sikia maombi yangu;

nisikilize, Ee Mungu wa Yakobo.

⁹Ee Mungu, uitazame ngao yetu,

mtazame kwa wema mpakwa mafuta wako.

¹⁰Siku moja katika nyua zako ni bora

kuliko siku elfu mahali pengine;

afadhali ningekuwa bawabu katika nyumba ya Mungu wangu

kuliko kukaa katika mahema ya waovu.

¹¹Kwa kuwa Bwana Mungu ni jua na ngao;

Bwana hutoa wema na heshima;

hakuna kitu chema anachowanyima

wale ambao hawana hatia.

¹²Ee Bwana wa majeshi,

heri mtu anayekutumaini wewe.