¹Wimbo ulio bora wa Sulemani.

²Unibusu kwa busu la kinywa chako,

kwa maana upendo wako unafurahisha kuliko divai.

³Manukato yako yananukia vizuri,

jina lako ni kama manukato yaliyomiminwa.

Ndiyo sababu wanawali wanakupenda!

⁴Nichukue twende nawe, na tufanye haraka!

Mfalme na anilete ndani ya vyumba vyake.

Tunakushangilia na kukufurahia,

tutasifu upendo wako kuliko divai.

Tazama jinsi ilivyo bora wakupende!

⁵Mimi ni mweusi, lakini napendeza,

enyi binti za Yerusalemu,

mweusi kama mahema ya Kedari,

kama mapazia ya hema la Sulemani.

⁶Usinikazie macho kwa sababu mimi ni mweusi,

kwa sababu nimefanywa mweusi na jua.

Wana wa mama yangu walinikasirikia

na kunifanya niwe mtunza mashamba ya mizabibu.

Shamba langu mwenyewe la mizabibu nimeliacha.

⁷Niambie, wewe ninayekupenda,

unalisha wapi kundi lako la kondoo

na ni wapi unapowapumzisha kondoo wako adhuhuri.

Kwa nini niwe kama mwanamke aliyefunikwa shela

karibu na makundi ya rafiki zako?

⁸Kama hujui, ewe mwanamke mzuri kuliko wote,

fuata nyayo za kondoo,

na kulisha wana-mbuzi wako

karibu na mahema ya wachungaji.

⁹Mpendwa wangu, ninakufananisha na farasi jike

aliyefungwa katika mojawapo ya magari ya vita ya Farao.

¹⁰Mashavu yako yanapendeza yakiwa na vipuli,

shingo yako ikiwa na mikufu ya vito.

¹¹Tutakufanyia vipuli vya dhahabu,

vyenye kupambwa kwa fedha.

¹²Mfalme alipokuwa mezani pake,

manukato yangu yalisambaza harufu yake nzuri.

¹³Mpenzi wangu kwangu mimi ni kifuko cha manemane

kati ya matiti yangu.

¹⁴Mpenzi wangu kwangu mimi ni kama kishada cha maua ya mhina

kutoka mashamba ya mizabibu ya En-Gedi.

¹⁵Tazama jinsi ulivyo mzuri, mpendwa wangu!

Tazama jinsi ulivyo mzuri!

Macho yako ni kama ya hua.

¹⁶Tazama jinsi ulivyo mzuri, mpenzi wangu!

Ee, tazama jinsi unavyopendeza!

Na kitanda chetu ni cha majani mazuri.

¹⁷Nguzo za nyumba yetu ni mierezi,

na mapao yetu ni miberoshi.