¹Mimi ni ua la Sharoni,

yungiyungi ya bondeni.

²Kama yungiyungi kati ya miiba,

ndivyo alivyo mpendwa wangu kati ya wanawali.

³Kama mti wa mtofaa miongoni mwa miti ya msituni,

ndivyo alivyo mpenzi wangu

miongoni mwa wanaume vijana.

Ninafurahia kuketi kivulini mwa mwanaume huyu,

na tunda lake ni tamu kwangu.

⁴Amenichukua hadi ukumbi wa karamu,

na bendera ya huyu mwanaume

juu yangu ni upendo.

⁵Nitie nguvu kwa zabibu kavu,

niburudishe kwa matofaa,

kwa maana ninazimia kwa mapenzi.

⁶Mkono wake wa kushoto uko chini ya kichwa changu,

na mkono wake wa kuume unanikumbatia.

⁷Binti za Yerusalemu, ninawaagiza

kwa paa na kwa ayala wa shambani:

Msichochee wala kuamsha mapenzi

hata yatakapotaka yenyewe.

⁸Sikiliza! Mpenzi wangu!

Tazama! Huyu hapa anakuja,

akirukaruka juu milimani

akizunguka juu ya vilima.

⁹Mpenzi wangu ni kama paa au ayala mchanga.

Tazama! Anasimama nyuma ya ukuta wetu,

akitazama kupitia madirishani,

akichungulia kimiani.

¹⁰Mpenzi wangu alizungumza na kuniambia,

“Inuka, mpendwa wangu,

mrembo wangu, tufuatane.

¹¹Tazama! Wakati wa masika umepita,

mvua imekwisha na ikapita.

¹²Maua yanatokea juu ya nchi;

majira ya kuimba yamewadia,

sauti za njiwa zinasikika

katika nchi yetu.

¹³Mtini unatunga matunda yake ya mwanzoni,

zabibu zinazochanua zaeneza harufu nzuri.

Inuka, njoo mpenzi wangu.

Mrembo wangu, tufuatane.”

¹⁴Hua wangu penye nyufa za majabali,

mafichoni pembezoni mwa mlima,

nioneshe uso wako,

na niisikie sauti yako,

kwa maana sauti yako ni tamu,

na uso wako unapendeza.

¹⁵Tukamatie mbweha,

mbweha wale wadogo

wanaoharibu mashamba ya mizabibu,

mashamba yetu ya mizabibu yaliyochanua.

¹⁶Mpenzi wangu ni wangu, nami ni wake,

yeye hujilisha kati ya yungiyungi.

¹⁷Hadi jua linapochomoza,

na vivuli vikimbie,

rudi, mpenzi wangu,

na uwe kama paa,

au kama ayala mchanga

juu ya vilima vya Betheri.