¹Laiti ungekuwa kwangu kama ndugu wa kiume,

ambaye aliyanyonya matiti ya mama yangu!

Kisha, kama ningekukuta huko nje,

ningekubusu,

wala hakuna mtu yeyote angenidharau.

²Ningekuongoza na kukuleta

katika nyumba ya mama yangu,

yeye ambaye amenifundisha.

Ningekupa divai iliyokolezwa unywe,

asali ya maua ya mikomamanga yangu.

³Mkono wake wa kushoto uko chini ya kichwa changu,

na mkono wake wa kuume unanikumbatia.

⁴Binti za Yerusalemu, ninawaagiza:

msichochee wala kuamsha mapenzi

hata yatakapotaka yenyewe.

⁵Ni nani huyu anayekuja kutoka nyikani

akimwegemea mpenzi wake?

Nilikuamsha chini ya mtofaa,

huko mama yako alipotunga mimba yako,

huko yeye alipata uchungu akakuzaa.

⁶Nitie kama muhuri moyoni mwako,

kama muhuri kwenye mkono wako;

kwa maana upendo una nguvu kama mauti,

wivu wake ni mkatili kama Kuzimu.

Unachoma kama mwali wa moto,

kama mwali mkubwa wa moto wa Bwana hasa.

⁷Maji mengi hayawezi kuuzimisha upendo,

mito haiwezi kuugharikisha.

Kama mtu angetoa mali yote ya nyumbani mwake

kwa ajili ya upendo,

angedharauliwa kabisa.

⁸Tunaye dada mdogo,

matiti yake hayajakua bado.

Tutafanya nini kwa ajili ya dada yetu

wakati atakapokuja kuposwa?

⁹Kama yeye ni ukuta,

tutajenga minara ya fedha juu yake.

Na kama yeye ni mlango,

tutamzungushia mbao za mwerezi.

¹⁰Mimi ni ukuta,

nayo matiti yangu ni kama minara.

Ndivyo ambavyo nimekuwa machoni pake

kama yule anayeleta utoshelevu.

¹¹Sulemani alikuwa na shamba la mizabibu huko Baal-Hamoni;

alikodisha shamba lake la mizabibu kwa wapangaji.

Kila mmoja angeleta kwa ajili ya matunda yake

shekeli elfu moja za fedha.

¹²Lakini shamba langu la mizabibu

ambalo ni langu mwenyewe

ni langu kutoa;

hizo shekeli elfu moja ni kwa ajili yako, ee Sulemani,

na shekeli mia mbili ni kwa ajili

ya wale wanaotunza matunda yake.

¹³Wewe ukaaye bustanini

pamoja na rafiki mliohudhuria,

hebu nisikie sauti yako!

¹⁴Njoo, mpenzi wangu,

uwe kama paa

au kama ayala mchanga

juu ya milima iliyojaa manukato.