Wahudumu wa Agano Jipya

¹Je! Tunaanza tena kujisifu wenyewe? Au tunahitaji, kama wengine, barua zenye sifa kuja kwenu, au kutoka kwenu?[#2 Kor 5:12; Rum 16:1; Mdo 18:27]

²Ninyi ndinyi barua yetu, iliyoandikwa mioyoni mwetu, inajulikana na kusomwa na watu wote;[#1 Kor 9:2]

³mnadhihirishwa kwamba mmekuwa barua ya Kristo tuliyoiandaa, iliyoandikwa si kwa wino, bali kwa Roho wa Mungu aliye hai; si katika vibao vya mawe, ila katika vibao ambavyo ni mioyo ya nyama.[#Kut 24:12; 31:18; 34:1; Mit 3:3; 7:3; Rum 15:16; Yer 31:33; Eze 11:19; 36:26]

⁴Na tumaini hilo tunalo mbele za Mungu kwa njia ya Kristo.

⁵Si kwamba tunatosha sisi wenyewe kufikiri kuwa neno lolote ni letu wenyewe, bali utoshelevu wetu unatoka kwa Mungu.[#2 Kor 2:6]

⁶Naye ndiye aliyetutosheleza kuwa wahudumu wa agano jipya; si wa andiko, bali wa roho; kwa maana andiko huua, bali roho huhuisha.[#Yer 31:31; 1 Kor 11:25; Rum 7:6; Yn 6:63]

⁷Basi, ikiwa huduma ya mauti, iliyoandikwa na kuchorwa katika mawe, ilikuja katika utukufu, hata Waisraeli hawakuweza kuukazia macho uso wa Musa, kwa sababu ya utukufu wa uso wake; nao ni utukufu uliokuwa ukibatilika;[#Kut 34:29]

⁸je! Huduma ya roho haitazidi kuwa katika utukufu?[#Gal 3:2,5]

⁹Kwa maana ikiwa huduma ya adhabu ina utukufu, sembuse huduma ya haki ina utukufu unaozidi.[#Kum 27:26; Rum 1:17; 3:21]

¹⁰Maana hata ile iliyotukuzwa haikuwa na utukufu hivi, kwa sababu ya utukufu uzidio sana.[#Kut 34:29]

¹¹Kwa maana, ikiwa ile inayobatilika ilikuwa na utukufu, zaidi sana ile idumuyo ina utukufu.

¹²Basi, kwa kuwa mna tumaini la namna hii, twatumia ujasiri mwingi;

¹³nasi si kama Musa alivyotia utaji juu ya uso wake, ili kwamba Waisraeli wasitazame sana mwisho wa ile iliyokuwa ikibatilika;[#Kut 34:33,35]

¹⁴ila fikira zao zilitiwa uzito. Kwa maana hata leo hivi, wakati lisomwapo Agano la Kale, utaji huo huo wakaa; yaani, haikufunuliwa kwamba huondolewa katika Kristo;[#Rum 11:25]

¹⁵ila hata leo, Torati ya Musa isomwapo, utaji huikalia mioyo yao.

¹⁶Lakini wakati wowote watakapomgeukia Bwana, ule utaji huondolewa.[#Kut 34:34; Rum 11:23,26]

¹⁷Basi “Bwana” ndiye Roho; lakini alipo Roho wa Bwana, hapo ndipo penye uhuru.[#Yn 7:39; 8:36; Kut 16:7; 24:17; Rum 8:2]

¹⁸Lakini sisi sote, kwa uso usiotiwa utaji, tukiurudisha utukufu wa Bwana, kama vile katika kioo, tunabadilishwa tufanane na mfano huo huo, toka utukufu hata utukufu, kama vile kwa utukufu utokao kwa Bwana, aliye Roho.