Askari mwema wa Yesu Kristo

¹Basi wewe, mwanangu, uwe hodari katika neema iliyo katika Kristo Yesu.

²Na mambo yale uliyoyasikia kwangu mbele ya mashahidi wengi, hayo uwakabidhi watu waaminifu watakaofaa kuwafundisha wengine vile vile.

³Ushiriki taabu pamoja nami, kama askari mwema wa Kristo Yesu.[#2 Tim 1:8; 4:5]

⁴Askari aliye vitani hajiingizi katika shughuli za dunia, maana lengo lake ni kumpendeza yeye aliyemweka kuwa askari.

⁵Hata mwanariadha hapewi taji, asiposhindana kwa kufuata sheria.[#2 Tim 4:8]

⁶Yampasa mkulima mwenye bidii ya kazi kuwa wa kwanza wa kupata fungu la mavuno.[#1 Kor 9:7,10]

⁷Yatafakari sana hayo nisemayo, kwa maana Bwana atakupa ufahamu katika mambo yote.

⁸Mkumbuke Yesu Kristo, aliyefufuka katika wafu, wa uzao wa Daudi kama inenavyo Injili yangu.[#Rum 1:3; 2:16; 1 Kor 15:4,20; 2 Sam 7:12]

⁹Nami katika hiyo nimeteswa hata kufungwa kama mtenda mabaya; lakini neno la Mungu halifungwi.[#Efe 3:1,13; Flp 1:12-14; 2:17]

¹⁰Kwa ajili ya hilo nastahimili mambo yote, kwa ajili ya wateule, ili wao nao waupate wokovu ule ulio katika Kristo Yesu, pamoja na utukufu wa milele.[#Kol 1:24]

¹¹Ni neno la kuaminiwa. Kwa maana,[#2 Kor 4:11]

Kama tukifa pamoja naye,

tutaishi pamoja naye pia;

¹²Kama tukistahimili,[#Mt 10:33; Lk 12:9]

tutamiliki pamoja naye;

Kama tukimkana yeye,

yeye naye atatukana sisi;

¹³Kama sisi hatuamini,[#Rum 3:2,3; Hes 23:19]

yeye hudumu wa kuaminiwa.

Kwa maana hawezi kujikana mwenyewe.

Mtendakazi anayekubaliwa na Mungu

¹⁴Uwakumbushe mambo hayo, ukiwaonya machoni pa Mungu, wasiwe na mashindano ya maneno, ambayo hayana faida, bali huwaharibu wanaoyasikia.[#1 Tim 6:4; Tit 3:9]

¹⁵Jitahidi kujionesha kuwa umekubaliwa na Mungu, mtendakazi asiye na sababu ya kutahayari, ukitumia kwa halali neno la kweli.[#1 Tim 4:6; Lk 12:42; Tit 2:7,8]

¹⁶Jiepushe na maneno machafu yasiyo na maana, ambayo si ya dini; kwa kuwa wataendelea zaidi katika maovu,[#1 Tim 4:7]

¹⁷na neno lao litaenea kama donda ndugu. Miongoni mwa hao wamo Himenayo na Fileto,[#1 Tim 1:20]

¹⁸waliopotoka kutoka kwenye kweli, wakisema ya kwamba kiyama imekwisha tokea, hata kuipindua imani ya watu kadhaa.

¹⁹Lakini msingi wa Mungu ulio imara umesimama, wenye mhuri huu,[#Hes 16:5,26; Yn 10:14; Isa 26:13; 28:16,17]

Bwana awajua walio wake.

Na tena,

Kila aliitaye jina la Bwana na auache uovu.

²⁰Basi katika nyumba kubwa havimo vyombo vya dhahabu na fedha tu, bali na vya mti, na vya udongo; vingine vina heshima, vingine havina.[#1 Kor 3:12]

²¹Basi ikiwa mtu amejitakasa kwa kujitenga na hao, atakuwa chombo cha kupata heshima, kilichosafishwa, kimfaacho Bwana, kimetengenezwa kwa kila kazi iliyo njema.[#2 Tim 3:17]

²²Lakini zikimbie tamaa za ujanani; ukafuate haki, na imani, na upendo, na amani, pamoja na wale wamwitao Bwana kwa moyo safi.[#1 Tim 6:11; 1:5]

²³Lakini uyakatae maswali ya upumbavu yasiyo ya elimu, ukijua ya kuwa huzaa magomvi.[#1 Tim 4:7]

²⁴Tena haimpasi mtumwa wa Bwana kuwa mgomvi; bali kuwa mwanana kwa watu wote, awezaye kufundisha, mvumilivu;[#Tit 1:7]

²⁵akiwaonya kwa upole wao washindanao naye, ili kama ikiwezekana, Mungu awajalie ili watubu na kuijua kweli;[#1 Tim 2:4]

²⁶wapate tena fahamu zao, na kutoka katika mtego wa Ibilisi, ambaye amewanasa, hata wakayafanya mapenzi yake.