Petro na Kornelio

¹Palikuwa na mtu Kaisaria, jina lake Kornelio, jemadari wa kikosi kilichoitwa Kiitalia,[#Mt 8:5; Mdo 27:1]

²mtu mtauwa, mcha Mungu, yeye na nyumba yake yote, naye alikuwa akiwapa watu sadaka nyingi, na kumwomba Mungu daima.

³Akaona katika maono waziwazi, kama saa tisa ya mchana, malaika wa Mungu, akimjia na kumwambia, Kornelio![#Mdo 3:1]

⁴Akamkodolea macho, akaogopa akasema, Kuna nini, Bwana? Akamwambia, Sala zako na sadaka zako zimefika juu na kuwa ukumbusho mbele za Mungu.

⁵Sasa basi, tuma watu Yafa, ukamwite Simoni, aitwaye Petro.

⁶Yeye ni mgeni wa mtu mmoja, jina lake Simoni, mtengenezaji wa ngozi, ambaye nyumba yake iko pwani, atakuambia yakupasayo kutenda.[#Mdo 9:43]

⁷Na yule malaika aliyesema naye akiisha kuondoka, Kornelio akawaita watumishi wake wawili wa nyumbani, na askari mmoja, mtu mtauwa kati ya wale waliomhudumia daima;

⁸na alipokwisha kuwaeleza mambo yote akawatuma kwenda Yafa.

⁹Hata siku ya pili, walipokuwa wakisafiri na kuukaribia mji, Petro alipanda juu darini, kwenda kuomba, yapata saa sita ya mchana;

¹⁰akaumwa na njaa sana, akataka kula; lakini walipokuwa wakiandaa, roho yake ikazimia,

¹¹akaona mbingu zimefunuka, na chombo kikishuka kama nguo kubwa, inateremshwa kwa pembe zake nne hadi chini;[#Mdo 11:5-17]

¹²ambayo ndani yake walikuwamo aina zote za wanyama wenye miguu minne, na hao watambaao, na ndege wa angani.

¹³Kisha sauti ikamjia, kusema, Inuka, Petro, uchinje ule.

¹⁴Lakini Petro akasema, La, hasha! Bwana, kwa maana sijawahi kula kitu kilicho kichafu au najisi.[#Eze 4:14; Law 11:1-47]

¹⁵Sauti ikamjia mara ya pili, ikimwambia, Vilivyotakaswa na Mungu, usiviite wewe najisi.[#Mt 15:11; Mk 7:15,19]

¹⁶Jambo hili likatendeka mara tatu; kisha kile chombo kikapokewa tena mbinguni.

¹⁷Wakati Petro alipokuwa akisumbuka ndani ya nafsi yake, juu ya maana ya maono hayo aliyoyaona, wale watu waliotumwa na Kornelio, wakatokeza. Walikuwa kukiulizia nyumba ya Simoni, wakiwa wamesimama mbele ya lango,

¹⁸wakaita; wakauliza kama Simoni aitwaye Petro anakaa humo.

¹⁹Na Petro alikuwa akiyafikiri yale maono. Roho akamwambia, Wako watu watatu wanakutafuta.[#Mdo 13:2; 15:28]

²⁰Basi inuka ushuke ufuatane nao, usione tashwishi, kwa maana ni mimi niliyewatuma.

²¹Petro akawashukia wale watu, akanena, Mimi ndiye mnayemtafuta. Mmekuja kwa sababu gani?

²²Wakasema, Kornelio jemadari, mtu mwenye haki, mchaji wa Mungu, aliye na sifa njema kwa taifa lote la Wayahudi, alionywa na malaika mtakatifu kutuma watu kwako, uende nyumbani kwake, ili asikilize kile utakachosema.

²³Akawakaribisha wawe wageni wake.[#Mdo 11:12]

Hata siku ya pili, Petro akaondoka akatoka pamoja nao, na baadhi ya ndugu waliokaa Yafa wakafuatana naye.

²⁴Kesho yake wakaingia Kaisaria. Na Kornelio alikuwa akiwangojea, akiwa amekusanya jamaa zake na rafiki zake.

²⁵Petro alipokuwa akiingia Kornelio akatoka amlaki akamwangukia miguuni mwake, akamsujudia.

²⁶Lakini Petro akamwinua, akasema, Simama, mimi nami ni mwanadamu.[#Mdo 14:15; Ufu 19:10]

²⁷Na katika kusema naye akaingia ndani, akaona watu wengi wamekusanyika.

²⁸Akawaambia, Ninyi mnajua ya kuwa si halali kwa mtu aliye Myahudi ashirikiane na mtu wa taifa lingine wala kumtembelea, lakini Mungu amenionya, nisimwite mtu yeyote mchafu wala najisi.

²⁹Kwa sababu hiyo nilikuja nilipoitwa, nisikatae; basi nawauliza, ni neno gani mliloniitia?

³⁰Kornelio akasema, Siku tatu zilizopita, katika saa ii hii, yaani saa tisa, nilikuwa nikisali nyumbani mwangu; nikamwona mtu amesimama mbele yangu, akiwa amevaa nguo zinazong'aa,

³¹akasema, Kornelio, kuomba kwako kumesikiwa, na sadaka zako zinakumbukwa mbele za Mungu.

³²Basi, tuma watu kwenda Yafa, ukamwite Simoni aitwaye Petro, anakaa katika nyumba ya Simoni, mtengenezaji wa ngozi, karibu na pwani; naye akija atasema nawe.

³³Mara nikatuma watu kwako, nawe umefanya vyema kuja. Basi sasa sisi sote tupo hapa mbele za Mungu, tupate kuyasikiliza maneno yote uliyoamriwa na Bwana.

Wamataifa wasikia Habari Njema

³⁴Petro akafumbua kinywa chake, akasema, Hakika natambua ya kuwa Mungu hana upendeleo;[#Kum 10:17; 1 Sam 16:7; Rum 2:11]

³⁵bali katika kila taifa mtu amchaye na kutenda haki hukubaliwa na yeye.[#Yn 9:31; 10:16]

³⁶Neno lile alilowapelekea wana wa Israeli akihubiri Habari Njema ya amani kwa Yesu Kristo (ndiye Bwana wa wote),[#Zab 107:20; 147:18; Isa 52:7; Nah 1:15; Mt 28:18]

³⁷jambo lile ninyi mmelijua, lililoenea kote katika Yudea likianzia Galilaya, baada ya ubatizo aliouhubiri Yohana;[#Mt 4:12-17]

³⁸habari za Yesu wa Nazareti, jinsi Mungu alivyomtia mafuta kwa Roho Mtakatifu na nguvu naye akazunguka huku na huko, akitenda kazi njema na kuponya wote walioonewa na Ibilisi; kwa maana Mungu alikuwa pamoja naye.[#Isa 61:1; Mt 3:16]

³⁹Nasi tu mashahidi wa mambo yote aliyoyatenda katika nchi ya Wayahudi na katika Yerusalemu; ambaye walimwua wakamtundika mtini.[#Kum 21:22]

⁴⁰Huyo Mungu alimfufua siku ya tatu, akamjalia kudhihirika,[#1 Kor 15:4-7]

⁴¹si kwa watu wote, bali kwa mashahidi waliokuwa wamekwisha kuchaguliwa na Mungu, ndio sisi, tuliokula na kunywa pamoja naye baada ya kufufuka kwake kutoka kwa wafu.[#Yn 14:19,22; 15:27; Mdo 1:4]

⁴²Akatuagiza tuwahubirie watu na kushuhudia ya kuwa huyu ndiye aliyeamriwa na Mungu awe Mhukumu wa walio hai na wafu.[#Mdo 17:31; Rum 14:9,10; 1 Pet 4:5; 2 Tim 4:1]

⁴³Huyo manabii wote humshuhudia, ya kwamba kwa jina lake kila amwaminiye atapata ondoleo la dhambi.[#Isa 33:24; 53:5,6; Yer 31:34; Eze 34:16; Dan 9:24]

Wamataifa wapokea Roho Mtakatifu

⁴⁴Petro alipokuwa akisema maneno hayo Roho Mtakatifu akawashukia wote waliolisikia lile neno.

⁴⁵Na wale waliotahiriwa, walioamini, wakashangaa, watu wote waliokuja pamoja na Petro, kwa sababu Mataifa nao wamemwagiwa kipawa cha Roho Mtakatifu.

⁴⁶Kwa maana waliwasikia wakisema kwa lugha, na kumwadhimisha Mungu. Ndipo Petro akajibu,[#Mdo 2:4; 19:6; Mk 16:17]

⁴⁷Ni nani awezaye kuzuia maji, hawa wasibatizwe, watu waliopokea Roho Mtakatifu vile vile kama sisi?

⁴⁸Akaamuru wabatizwe kwa Jina lake Yesu Kristo. Ndipo wakamsihi azidi kukaa siku kadhaa.[#Yn 4:40]