Sheria kuhusu miji ya ukimbizi

¹BWANA, Mungu wako, atakapoyakatilia mbali hayo mataifa yenye nchi akupayo BWANA, Mungu wako, nawe ukawafuata, na kukaa katika miji yao, na katika nyumba zao;[#Yos 20:1-9]

²itenge miji mitatu iwe kwako katikati ya nchi yako, akupayo BWANA, Mungu wako, kuimiliki.[#Yos 20:2]

³Itengeneze njia, igawanye na mipaka ya nchi yako, akurithishayo BWANA, Mungu wako, iwe mafungu matatu, ili kwamba kila mwenye kuua mtu apate kukimbilia huko.

⁴Na hii ndiyo hukumu ya mwenye kuua mtu, atakayekimbilia huko awe hai; atakayemwua mwenziwe pasipo kukusudia, wala hakumchukia tangu hapo mwanzo;

⁵kama aingiapo mtu na mwenziwe mwituni kwenda kukata kuni, akapeleka mkono wake na shoka ili kukata mti, likatoka shoka katika mpini, likampiga yule mwenziwe hata akafa; basi na akimbilie katika miji hii mmojawapo awe hai;

⁶asije akaandamwa mwuaji na mwenye kulipiza kisasi cha damu, moyo wake ukali na hasira, akampata kwa njia kuwa ndefu, akamwua; wala hana haki ya kuuawa, kwa kuwa hakumchukia tangu hapo.

⁷Kwa sababu hii ninakuamuru, na kukuambia, Ujitengee miji mitatu.

⁸Na kama BWANA, Mungu wako, akiueneza mpaka wako kama alivyowaapia baba zako, akakupa na nchi yote aliyoahidi kwamba atawapa baba zako;[#Mwa 15:18]

⁹nawe ukiyashika maagizo haya yote nikuagizayo leo, na kuyafanya, kumpenda BWANA, Mungu wako, na kwenda siku zote katika njia zake, ndipo ujiongezee miji mitatu tena, pamoja na mitatu ile;[#Yos 20:7]

¹⁰isije ikamwagika damu ya asiye makosa kati ya nchi yako akupayo BWANA, Mungu wako, iwe urithi, ikawa na damu juu yako.

¹¹Lakini mtu awaye yote akimchukia mwenziwe na kumwotea na kumwinukia, akampiga hata akafa; naye akakimbilia miji hii mmojawapo;[#Kut 21:12; Hes 35:16; Mit 28:17; 29:10; 1 Yoh 3:15]

¹²ndipo wazee wa mji wake wapeleke ujumbe kumtwaa huko, na kumwua katika mkono wa mwenye kulipiza kisasi cha damu, apate kufa.

¹³Jicho lako lisimhurumie, lakini uondoe damu ya asiye makosa katika Israeli, ili upate kufanikiwa.[#1 Fal 2:31]

Mipaka ya ardhi

¹⁴Usiiondoe alama ya mpaka wa jirani yako, waliouweka watu wa kale katika urithi wako, utakaorithi ndani ya nchi akupayo BWANA, Mungu wako, uimiliki.[#Kum 27:17; Ayu 24:2; Mit 22:28; Hos 5:10]

Sheria kuhusu mashahidi

¹⁵Shahidi mmoja asimwinukie mtu awaye yote kumshuhudia kwa uovu wowote, wala kwa dhambi yoyote, katika makosa akosayo yoyote; jambo na lithibitishwe kwa vinywa vya mashahidi wawili, au watatu.[#Hes 35:30; Kum 17:6; Mt 18:16; Yn 8:17; 19:31; 2 Kor 13:1; 1 Tim 5:19; Ebr 10:28]

¹⁶Shahidi mdhalimu akimwinukia mtu yeyote na kushuhudia juu yake ya upotovu;[#Zab 27:12; 1 Fal 21:13]

¹⁷ndipo wale watu washindanao kwa mambo yale na wasimame wote wawili mbele za BWANA, mbele ya makuhani na waamuzi watakaokuwapo siku hizo;

¹⁸nao waamuzi na watafute kwa bidii; na tazama, yule shahidi akiwa shahidi wa uongo, naye ametoa ushahidi wa uongo juu ya nduguye;

¹⁹ndipo mtamfanyia kama alivyodhani kumfanyia nduguye; ndivyo utakavyoondoa uovu katikati yako.[#Mit 19:5; Dan 6:24]

²⁰Na watakaosalia watasikia na kuogopa, wasifanye tena uovu mfano wa huo katikati yako.[#Kum 17:13; 21:21]

²¹Wala jicho lako lisiwe na huruma; uzima kwa uzima, jicho kwa jicho, jino kwa jino, mkono kwa mkono, mguu kwa mguu.[#Kut 21:23-25; Law 24:19-20; Mt 5:38]