¹Sikilizeni, enyi mbingu, nami nitanena;[#Zab 50:4; Isa 1:2; Yer 2:12; 6:19]

Na nchi isikie maneno ya kinywa changu.

²Mafundisho yangu yatadondoka kama mvua,[#2 Sam 23:4; Ayu 29:22,23; Isa 55:10; Hos 6:4; 14:5; 1 Kor 3:6,8; Ebr 6:7; Zab 72:6]

Maneno yangu yatatona-tona kama umande;

Kama manyunyu juu ya majani mabichi;

Kama matone ya mvua juu ya mimea.

³Maana nitalitangaza Jina la BWANA;

Mpeni ukuu Mungu wetu.

⁴Yeye Mwamba, kazi yake ni kamilifu;[#2 Sam 22:31; Dan 4:37; Yer 10:10; Ayu 34:10]

Maana, njia zake zote ni haki.

Mungu wa uaminifu, asiye na uovu,

Yeye ndiye mwenye haki na adili.

⁵Wametenda mambo ya uharibifu,

Hawawi watoto wake, hii ndiyo ila yao;

Wao ni kizazi chenye ukaidi, kilichopotoka.

⁶Je! Mnamlipa BWANA hivi,[#Zab 116:12; Isa 63:16; 2 Sam 7:23; Zab 74:2]

Enyi watu wapumbavu na ujinga?

Je! Yeye siye baba yako aliyekununua?

Amekufanya, na kukuweka imara.

⁷Kumbuka siku za kale,

Tafakari miaka ya vizazi vingi;

Mwulize baba yako, naye atakuonesha;

Wazee wako, nao watakuambia.

⁸Yeye Aliye Juu alipowapa mataifa urithi wao,[#Mdo 17:26; Zek 9:2; Mwa 11:8]

Alipowabagua wanadamu,

Aliweka mipaka ya watu

Kwa kadiri ya hesabu ya wana wa Israeli.

⁹Maana, sehemu ya BWANA ni watu wake,[#1 Sam 10:1]

Yakobo ni kura ya urithi wake.

¹⁰Alimkuta katika nchi ya ukame,[#Kum 4:36; Neh 9:20; Zab 32:7,10; 147:19,20; Rum 2:18; 3:2; Zab 17:8; Mit 7:2]

Na katika jangwa tupu litishalo;

Alimzunguka, akamtunza;

Akamhifadhi kama mboni ya jicho;

¹¹Mfano wa tai ataharikishaye kiota chake;

Na kupapatika juu ya makinda yake,

Alikunjua mbawa zake, akawatwaa,

Akawachukua juu ya mbawa zake;

¹²BWANA peke yake alimwongoza,

Wala hapakuwa na mungu mgeni pamoja naye.

¹³Alimpandisha mahali pa nchi palipoinuka,[#Isa 58:14; Ayu 29:6]

Naye akala mazao ya mashamba;

Akamnyonesha asali iliyotoka jabalini,

Na mafuta yaliyotoka katika mwamba wa gumegume;

¹⁴Siagi ya ng'ombe, na maziwa ya kondoo,[#Zab 147:14; Mwa 49:11; Mt 26:28,29; Yn 6:55,56]

Pamoja na mafuta ya wana-kondoo,

Kondoo dume wa Kibashani, na mbuzi,

Na unono wa ngano iliyo nzuri;

Ukanywa divai, damu ya mizabibu.

¹⁵Lakini Yeshuruni alinenepa, akapiga teke;[#Isa 1:4; Zab 89:26]

Umenenepa, umekuwa mnene, umewanda;

Ndipo akamwacha Mungu aliyemfanya,

Akamdharau Mwamba wa wokovu wake.

¹⁶Wakamtia wivu kwa miungu migeni,

Wakamkasirisha kwa machukizo.

¹⁷Walitoa sadaka kwa pepo, si Mungu,[#1 Kor 10:20]

Kwa miungu wasiyoijua,

Kwa miungu mipya iliyotokea siku zilizo karibu,

Ambayo baba zenu hawakuiogopa.

¹⁸Humkumbuki Mwamba aliyekuzaa,

Mungu aliyekuzaa umemsahau.

¹⁹BWANA akaona, akawachukia,

Kwa sababu ya kukasirishwa na wanawe na binti zake.

²⁰Akasema, Nitawaficha uso wangu,[#Mt 17:17]

Nitaona mwisho wao utakuwaje;

Maana, ni kizazi cha ukaidi mwingi,

Watoto wasio na imani ndani yao.

²¹Wamenitia wivu kwa kisicho Mungu;[#1 Kor 10:22; Rum 10:19; 1 Sam 12:21]

Wamenikasirisha kwa ubatili wao;

Nami nitawatia wivu kwa wasio watu,

Nami nitawakasirisha kwa taifa lipumbaalo.

²²Maana, moto umewashwa kwa hasira yangu,[#Omb 4:11]

Unateketea hata chini ya kuzimu,

Unakula dunia pamoja na mazao yake,

Unaunguza misingi ya milima.

²³Nitaweka madhara juu yao chungu chungu;

Nitawapiga kwa mishale yangu hata ikaishe;

²⁴Watakonda kwa njaa, wataliwa na makaa ya moto,

Na uharibifu mkali;

Nitawapelekea meno ya wanyama wakali,

Pamoja na sumu ya wadudu watambaao mavumbini.

²⁵Nje upanga utawafisha[#Omb 1:20]

Na ndani ya vyumba, utisho;

Utaangamiza mvulana na msichana,

Anyonyaye pamoja na mwenye mvi,

²⁶Nilisema, Ningewatawanyia mbali,

Ningekomesha kumbukumbu lao kati ya wanadamu;

²⁷Isipokuwa niliogopa makamio ya adui,[#Zab 140:8]

Adui zao wasije wakafikiri uongo,

Wasije wakasema, Mkono wetu umetukuka,

Wala BWANA hakuyafanya haya yote.

²⁸Maana hawa ni taifa wasio shauri,

Wala fahamu hamna ndani yao.

²⁹Laiti wangekuwa na akili, hata wakafahamu haya,[#Zab 81:13]

Ili watafakari mwisho wao.

³⁰Mmoja angefukuzaje watu elfu,[#Yos 23:10; Zab 44:12]

Wawili wangekimbizaje elfu kumi,

Kama Mwamba wao asingaliwauza,

Kama BWANA asingaliwatoa?

³¹Maana, Mwamba wao si kama Mwamba wetu,[#1 Sam 4:8; Yer 40:3]

Hata adui zetu wenyewe ndivyo wahukumuvyo.

³²Maana, mzabibu wao ni mzabibu wa Sodoma,

Nao ni wa mashamba ya Gomora;

Zabibu zao ni zabibu za uchungu,

Vichala vyao ni vichungu.

³³Mvinyo yao ni sumu ya majoka,

Uchungu mkali wa nyoka.

³⁴Je! Haya hayakuwekwa akiba kwangu?[#Ayu 14:17]

Na kutiwa mhuri kati ya hazina yangu?

³⁵Kisasi ni changu mimi, na kulipa,[#Rum 12:19; 13:4; Ebr 10:30; Zab 94:1]

Wakati itakapoteleza miguu yao;

Maana siku ya msiba wao imekaribia,

Na mambo yatakayowapata yatafanya haraka.

³⁶Kwa kuwa BWANA atawaamua watu wake,[#Zab 135:14; Amu 2:18; Zab 90:13; 105:45; Yer 31:20; Yoe 2:14]

Atawahurumia watumwa wake,

Aonapo ya kuwa nguvu zao zimeondoka,

Na ya kuwa habaki mtu, aliyefungwa wala asiyefungwa,

³⁷Naye atasema, Iko wapi miungu yao,[#Amu 10:14; 2 Fal 3:13; Yer 2:28]

Mwamba ule walioutumaini;

³⁸Uliokula shahamu za sadaka zao,

Na kunywa divai ya sadaka zao za kinywaji?

Na waondoke na kuwasaidia ninyi;

Na wawe hao himaya yenu.

³⁹Fahamu sasa ya kuwa Mimi, naam, Mimi ndiye,[#Isa 41:4; 45:5; 46:4; 1 Sam 2:6; 2 Fal 5:7; Ayu 5:18; Zab 68:20; Isa 43:13; Hos 6:1]

Wala hapana Mungu mwingine ila Mimi;

Naua Mimi, nahuisha Mimi,

Nimejeruhi, tena naponya;

Wala hapana awezaye kuokoa katika mkono wangu,

⁴⁰Maana, nainua mkono wangu mbinguni,[#Kut 6:8]

Na kusema, Kama Mimi niishivyo milele,

⁴¹Nikiunoa upanga wangu wa umeme,

Mkono wangu ukishika hukumu,

Nitawatoza kisasi adui zangu,

Nitawalipa wanaonichukia.

⁴²Nitailevya mishale yangu kwa damu,[#Ayu 13:24]

Na upanga wangu utakula nyama;

Pamoja na damu ya waliouawa na waliotekwa nyara,

Katika vichwa vya wakuu wa adui.

⁴³Furahini, enyi mataifa, pamoja na watu wake;[#Rum 15:10; Ufu 19:2; 6:10; Zab 85:1]

Kwa maana atatwaa kisasi kwa damu ya watumwa wake,

Atawatoza kisasi adui zake,

Tena atafanya kafara kwa nchi yake, na watu wake.

⁴⁴Musa akaja akasema maneno haya yote ya wimbo huu masikioni mwa watu, yeye na Yoshua, mwana wa Nuni.

⁴⁵Musa akamaliza kuwaambia Israeli wote maneno haya yote;

⁴⁶akawaambia, Yawekeni mioyoni mwenu maneno yote ambayo nashuhudia kwenu hivi leo; nayo waamuruni watoto wenu, wayatunze na kuyafanya maneno yote ya torati hii.

⁴⁷Kwa maana si jambo lisilofaa kwenu; maana, ni maisha yenu, na kwa jambo hili mtazifanya siku zenu kuwa nyingi juu ya nchi mwivukiayo Yordani kuimiliki.[#Mit 3:2; Rum 10:5]

Utabiri wa kifo cha Musa

⁴⁸BWANA akasema na Musa siku hiyo hiyo, akamwambia,[#Hes 27:12-14; Kum 3:23-27]

⁴⁹Kwea katika mlima huu wa Abarimu, mpaka kilima cha Nebo, kilicho katika nchi ya Moabu, kuelekea Yeriko; ukaangalie nchi ya Kanaani niwapayo wana wa Israeli kuimiliki;

⁵⁰ukafe katika kilima, huko ukweako, ukusanywe uwe pamoja na jamaa zako; kama alivyokufa nduguyo Haruni katika mlima wa Hori, akakusanywa awe pamoja na watu wake;

⁵¹kwa sababu mlinikosa ninyi juu yangu katikati ya wana wa Israeli katika maji ya Meriba huko Kadeshi, katika bara ya Sini; kwa kuwa hamkunitakasa katikati ya wana wa Israeli.[#Hes 20:11]

⁵²Kwani utaiona hiyo nchi mbele yako, lakini hutakwenda huko kuingia hiyo nchi niwapayo wana wa Israeli.