Baraka ya mwisho ya Musa kwa Israeli

¹Hii ndiyo baraka ya Musa, huyo mtu wa Mungu, aliyowabarikia wana wa Israeli kabla ya kufa kwake.[#Mwa 49:28; Lk 24:50; Yn 14:27; 16:33]

²Akasema,[#Kut 19:18; Amu 5:4; Hab 3:3; Dan 7:10; Mdo 7:53; Gal 3:19; Ebr 2:2]

BWANA alitoka Sinai,

Akawajia kutoka Seiri;

Aliangaza katika kilima cha Parani,

Akaja Meribath-kadeshi.

Upande wa mkono wake wa kulia

Palikuwa na sheria ya motomoto kwao.

³Hakika ayapenda hayo makabila ya watu;[#Hos 11:1; Mal 1:2; 1 Sam 2:9; Zab 50:5; Lk 10:39; Mdo 22:3]

Watakatifu wake wote wamo mkononi mwako;

Nao waliketi miguuni pako;

Watapokea kila mmoja katika maneno yako.

⁴Musa alituagiza torati,[#Yn 7:19]

Ni urithi kwa mkutano wa Yakobo.

⁵Akawa mfalme katika Yeshuruni,[#Ayu 29:25]

Walipokutanika wakuu wa watu,

Makabila yote ya Israeli pamoja.

⁶Reubeni na aishi, asife;

Lakini watu wake na wawe wachache.

⁷Na baraka ya Yuda ni hii; akasema,[#Mwa 49:8]

Isikize, Ee BWANA, sauti ya Yuda,

Umlete ndani kwa watu wake;

Alijitetea kwa mikono yake;

Nawe utakuwa msaada juu ya adui zake.

⁸Akamnena Lawi,[#Kut 17:7; 28:30; Hes 20:13; 27:21; Law 8:8]

Thumimu yako na Urimu yako vina mtakatifu wako,

Uliyemjaribu huko Masa;

Ukateta naye kwenye maji ya Meriba.

⁹Aliyemtaja baba yake na mama yake, Mimi sikumwona;[#Kum 13:6; Mt 10:37; 12:48; Mk 10:29; Lk 14:26; Kut 32:26; Yer 18:18; Mal 2:5]

Wala nduguze hakuwakubali;

Wala hakuwajua watoto wake mwenyewe;

Maana wameliangalia neno lako,

Wamelishika agano lako.

¹⁰Watamfundisha Yakobo hukumu zako,[#Law 10:11; Kut 30:7,8; Zab 51:19]

Na Israeli torati yako,

Wataweka uvumba mbele zako,

Na sadaka nzima za kuteketezwa madhabahuni pako.

¹¹Ee BWANA, ubariki mali zake,[#Zab 20:3]

Utakabali kazi ya mikono yake;

Uwapige viuno vyao waondokao juu yake,

Na wenye kumchukia, wasiinuke tena.

¹²Akamnena Benyamini,

Mpenzi wa BWANA atakaa salama kwake;

Yuamfunika mchana kutwa,

Naye hukaa kati ya mabega yake.

¹³Na Yusufu akamnena,[#Mwa 49:25; 27:28]

Nchi yake na ibarikiwe na BWANA;

Kwa vitu vya thamani vya mbinguni, kwa huo umande,

Na kwa kilindi kilalacho chini,

¹⁴Na kwa vitu vilivyo bora vya matunda ya jua,

Na kwa vitu vilivyo bora vya mavuno ya miezi,

¹⁵Na kwa vitu viteule vya milima ya kale,[#Hab 3:6]

Na kwa vitu vilivyo bora vya vilima vya milele,

¹⁶Na kwa vitu vilivyo bora vya nchi, na kujaa kwake,[#Kut 3:2,4; Mdo 7:30]

Na uradhi wake aliyekaa ndani ya kile kichaka;

Na ije baraka juu ya kichwa chake Yusufu,

Juu ya utosi wa kichwa chake aliyetengwa na nduguze.

¹⁷Mzaliwa wa kwanza wa ng'ombe wake dume, enzi ni yake;[#1 Fal 22:11; Zab 44:5]

Na pembe zake ni pembe za nyati;

Kwa hizo atayasukuma mataifa yote, hata ncha za nchi;

Nao ni makumi ya maelfu ya Efraimu,

Nao ni maelfu ya Manase.

¹⁸Na Zabuloni akamnena,

Furahi Zabuloni, katika kutoka kwako;

Na Isakari, katika hema zako.

¹⁹Watayaita mataifa waje mlimani;[#Isa 2:3; Yer 50:4,5; Zab 4:5]

Wakasongeze huko sadaka za haki;

Kwa kuwa watanyonya wingi wa bahari,

Na akiba zilizofichamana za mchangani.

²⁰Na Gadi akamnena,[#Yos 13:10; 1 Nya 12:8]

Na abarikiwe amwongezaye Gadi;

Yeye hukaa kama simba jike,

Hurarua mkono, naam, na utosi wa kichwa.

²¹Akajichagulia sehemu ya kwanza,[#Hes 32:16,21; Yos 4:12]

Kwani ndiko lilikowekwa fungu la mtoa-sheria;

Akaja pamoja na wakuu wa watu,

Akaitekeleza haki ya BWANA,

Na hukumu zake kwa Israeli.

²²Na Dani akamnena,[#Yos 19:47; Amu 18:27]

Dani ni mwanasimba,

Arukaye kutoka Bashani.

²³Na Naftali akamnena,[#Yos 19:32]

Ee Naftali, uliyeshiba fadhili,

Uliyejawa na baraka ya BWANA;

Umiliki magharibi na kusini.

²⁴Na Asheri akamnena,[#Ayu 29:6]

Na abarikiwe Asheri kwa watoto;

Na akubaliwe katika nduguze,

Na achovye mguu wake katika mafuta.

²⁵Makomeo yako yatakuwa ya chuma na shaba;

Na kadiri ya siku zako ndivyo zitakavyokuwa nguvu zako.

²⁶Hapana aliyefanana na Mungu, Ee Yeshuruni,[#Kut 15:11; Zab 86:8; Yer 10:6; Zab 68:4,33,34; 104:3; Hab 3:8]

Ajaye amepanda juu ya mbingu ili akusaidie.

Na juu ya mawingu katika utukufu wake.

²⁷Mungu wa milele ndiye makazi yako,[#Zab 90:1]

Na mikono ya milele i chini yako.

Na mbele yako amemsukumia mbali adui;

Akasema, Angamiza.

²⁸Na Israeli anakaa salama,[#Hes 23:9; Yer 23:6; 33:16]

Chemchemi ya Yakobo peke yake,

Katika nchi ya ngano na divai;

Naam, mbingu zake zadondoza umande.

²⁹U heri, Israeli.[#Zab 144:15; 2 Sam 7:23]

Ni nani aliye kama wewe, taifa lililookolewa na BWANA!

Ndiye ngao ya msaada wako,

Na upanga wa utukufu wako;

Na adui zako watajitiisha chini yako,

Nawe utapakanyaga mahali pao pa juu.