Utabiri juu ya Babeli, Edomu na Arabuni

¹Ufunuo juu ya nyika kando ya bahari. Kama tufani za Negebu zikaribiavyo kwa kasi, inakuja kutoka nyikani, toka nchi itishayo.[#Zek 9:14; #21:1 tafsiri yake ni Nchi za kusini.]

²Nimeoneshwa maono magumu; atendaye hila anatenda hila, mharibu anaharibu. Panda juu, Ee Elamu; husuru, Ee Umedi; mimi ninakomesha maombolezo yake yote.[#1 Sam 24:13; Yer 49:34; Isa 24:16; 13:17]

³Kwa sababu hiyo viuno vyangu vimejaa maumivu, uchungu umenishika, kama uchungu wa mwanamke azaaye; ninaumwa sana, nisiweze kusikia; nimefadhaishwa kwa hofu, nisiweze kuona.

⁴Moyo wangu unapigapiga, utisho umenitaabisha, gizagiza la jioni nilipendalo limegeuka likanitetemesha.[#Kum 28:67]

⁵Wanaandaa meza, wanaweka ulinzi, wanakula, wanakunywa. Simameni, enyi wakuu, itieni ngao mafuta.[#Dan 5:5]

⁶Maana Bwana ameniambia hivi, Nenda, weka mlinzi; aonayo na ayatangaze.

⁷Naye akiona kundi la wapanda farasi, wakienda wawili wawili, na kundi la punda, na kundi la ngamia; na asikilize kwa makini, kwa makini sana.

⁸Ndipo akalia kama simba, Ee Bwana, mimi nasimama daima juu ya mnara wakati wa mchana, na kila usiku ninakaa katika zamu ya ulinzi wangu.[#Hab 2:1]

⁹Na, tazama, linakuja kundi la watu, wapanda farasi, wakienda wawili wawili. Akajibu na kusema, Babeli umeanguka, umeanguka; na sanamu zote za miungu yake zimevunjwa chini.[#Isa 13:19; Yer 50:2; Ufu 14:8; 18:2]

¹⁰Ewe wangu niliyekufikicha na kukupura; Hayo niliyoyasikia kwa BWANA wa majeshi, Mungu wa Israeli, nayatangaza kwenu.[#Yer 51:33; Mik 4:13; Hab 3:12]

¹¹Ufunuo juu ya Duma. Mtu ananililia toka Seiri, Ee mlinzi, habari gani za usiku? Ee mlinzi, habari gani za usiku?[#1 Nya 1:30; Eze 35:2; Oba 1:1]

¹²Mlinzi akasema, Mchana unakuja na usiku pia; mkitaka kuuliza, ulizeni; njoni tena.

¹³Ufunuo juu ya Arabuni.[#1 Nya 1:9]

Ndani ya msitu wa Arabuni mtalala,

Enyi misafara ya Wadedani.

¹⁴Waleteeni wenye kiu maji,[#Ayu 6:19]

Enyi wenyeji wa nchi ya Tema;

Nendeni kuwalaki wakimbiao na chakula chao.

¹⁵Kwa maana wanakimbia mbele ya panga,

Upanga uliofutwa, na upinde uliopindwa,

Na mbele ya ukali wa vita.

¹⁶Kwa sababu Bwana ameniambia hivi, Katika muda wa mwaka, kama miaka ya mtu mwenye kuajiriwa, utaangamia utukufu wote wa Kedari.[#Mwa 25:13; Zab 120:5; Wim 1:5; Isa 60:7]

¹⁷Na mabaki ya hesabu ya wavuta pinde, hao mashujaa wa Kedari watakuwa wachache; maana BWANA, Mungu wa Israeli, amenena neno hili.[#Hes 23:19; 1 Sam 15:29; Isa 1:20; Mt 24:35; Mk 13:31; Lk 21:33; 1 Pet 1:25]